दिग्दर्शक केदार शिंदे यांचा ‘बाईपण भारी देवा’ चित्रपट बराच चर्चेत राहिला. चित्रपट प्रदर्शनाच्या पहिल्या दिवसापासूनच प्रेक्षकांचा उदंड प्रतिसाद मिळत आहे. अजूनही काही चित्रपटगृहांमध्ये हा चित्रपट सुरु असून त्यालादेखील तितकाच प्रतिसाद मिळत आहे. सहा बहिणींच्या व एकूणच महिलांच्या भावविश्वावर फिरणाऱ्या या चित्रपटाच्या कथानकावर महिलांसह पुरुष प्रेक्षकांच्या मनावर राज्य केलं आहे. शिवाय, अभिनेत्री रोहिणी हट्टंगडी, वंदना गुप्ते, सुकन्या मोने, सुचित्रा बांदेकर, शिल्पा नवलकर आणि दीपा परब या अभिनेत्रींच्या सुंदर अभिनयाचे प्रेक्षकांकडून कौतुकाचा वर्षाव झाला होता. (Baipan Bhari Deva completes Two Months)
‘बाईपण भारी देवा’ चित्रपट ३० जून रोजी प्रेक्षकांच्या भेटीला आला होता, ज्याला नुकतेच दोन महिने पूर्ण झाले आहे. यानिमित्त दिग्दर्शक केदार शिंदे यांनी त्यांच्या इंस्टाग्राम अकाउंटवर एक फोटो पोस्ट केला आहे. या फोटोमध्ये केदार यांच्यासह चित्रपटातील सहा अभिनेत्री दिसत आहे.
या फोटोसह लिहिलेल्या पोस्टमध्ये केदार शिंदे म्हणाले, “काल ‘बाईपण भारी देवा’ चित्रपट प्रदर्शित होऊन २ महिने पुर्ण झाले, या दोन महिन्यांत खुप काही मिळालं. तुम्हा रसिकांच्या मनात घर करता आलं यापेक्षा अहो भाग्य ते काय दुसरं? या सहा लक्ष्मींच्या पावलाने चित्रपटगृहात गर्दी सुरू झाली आणि त्यानंतर चित्रपटगृह तुडुंब भरून वाहतायत. श्री स्वामी समर्थांच्या कृपेने घवघवीत यश या सिनेमाला लाभलं. मी या सगळ्याचा एक भाग आहे यापेक्षा आनंद तो काय?”
हे देखील वाचा – छत्रपती संभाजी महाराजांची भूमिका साकारणार विकी कौशल?, चित्रपटाच्या तयारीला सुरुवात
“अजूनही काही ठिकाणी चित्रपट सुरू आहे. महाराष्ट्रातील प्रत्येक गावात मंगळागौरीचे फेर धरले जातायत. सहा लक्ष्मींच्या साड्या, दागिने याचे ट्रेन्ड सर्वत्र दिसून येतायत. श्री सिद्धिविनायकाचा महाप्रसाद मिळाला. पुढे नवं काम करताना मला या जबाबदारीची जाणीव सतत होत राहणार. त्यामुळे चांगलंच देण्याचा माझा प्रयत्न असेल.” असं केदार शिंदे या पोस्टमध्ये म्हणाले आहेत.
हे देखील वाचा – मेहंदी, लगीनघाई अन्…; मराठमोळ्या अभिनेत्रीच्या घरी लगीनघाई सुरु, हातावरील मेहंदी रंगण्यास झाली सुरुवात
‘बाईपण भारी देवा’ चित्रपटाने केवळ महाराष्ट्रातच नाही, तर देश-विदेशातील प्रेक्षकांना चांगलीच भुरळ घातली आहे. विशेष म्हणजे, मराठीसह हिंदीतील अनेक कलाकार व विविध क्षेत्रातील अनेक मान्यवरांनीसुद्धा चित्रपटाचे भरभरून कौतुक केले आहे. चित्रपटाच्या या यशामागे दिग्दर्शक केदार शिंदे यांचा मोलाचा वाटा आहे. (Baipan Bhari Deva completes Two Months)
