सध्या सोशल मीडियावर रिल स्टारची अधिकाधिक चलती असल्याचं चित्र पाहायला मिळतं. सोशल मीडिया इन्फ्ल्युएन्सर म्हणून काही चेहरे चर्चेत आले. त्यातीलच एक चेहरा म्हणजे कोकण हार्टेड गर्ल अंकिता वालावलकर. अंकिता सोशल मीडियाद्वारे अधिकाधिक लोकांशी संपर्क साधते. शिवाय तिचे सोशल मीडियावर लाखो चाहते आहेत. अशामध्येच अंकिता राजकीय क्षेत्रात प्रवेश करणार का? अशा बऱ्याच चर्चा रंगल्या होत्या. आता तिने यावर उत्तर दिलं आहे.
नुकत्याच दिलेल्या एका मुलाखतीत अंकिताला “राजकीय क्षेत्रामध्ये प्रवेश करणार का?” असा प्रश्न विचारण्यात आला. यावेळी अंकिताने अगदी स्पष्ट शब्दांमध्ये उत्तर दिलं. ती म्हणाली, “पहिल्यापासून राजकारणातलं व्यक्तीमत्त्व म्हणून बाळासाहेब ठाकरे मला खूप आवडायचे. त्यांची परखड बोलण्याची शैली मला आवडत होती. त्यानंतर राज ठाकरे हे व्यक्तीमत्त्व मला आवडू लागलं”.
“त्यामुळे त्यांच्याकडे माझा अधिक कल आहे असं मी म्हणणार नाही. पण कोण चांगलं किंवा कोण वाईट काम करत आहे हे आपल्याला कळतं. म्हणून त्या पक्षाबरोबर (मनसे) माझा अधिक संबंध आला. त्यानंतर इन्फ्युएन्सर म्हणून मी राज ठाकरे यांच्या घरीही गेले होते”. अंकिताने राज ठाकरे यांची भेट घेत मनसेच्या कार्यक्रमात उपस्थितीही दर्शवली होती.
पुढे ती म्हणाली, “पक्षामध्ये प्रवेश करण्याचा माझा आता काही विचार नाही. पण माझ्यामुळे कोणाचं काही भलं होत असेल आणि हिच योग्य संधी आहे असं मला वाटलं तर मी तिथे उपस्थित असते. त्यादरम्यान मी पक्ष वगैरे काही बघत नाही. व्यक्ती व प्रसंग बघून नंतरच मी निर्णय घेते”. आता खरंच अंकिता मनसेचा चेहरा बनणार का? हे पाहावं लागेल.