सोशल मीडियाचा वापर आता सर्वच क्षेत्रात मोठ्या प्रमाणावर होताना पाहायला मिळत आहे. सोशल मीडियावर इन्फ्लुएन्सर्सचे व्हायरल होणारे रील व्हिडीओ सगळ्यांच्याच पसंतीस पडतात. ही इन्फ्लुएन्सर्स मंडळी वेगवगेळ्या विषयांवर हटके रील, व्हिडीओ बनवत तगडा असा कंटेन्ट प्रेक्षकांसाठी आणतात. प्रेक्षकवर्गही या इन्फ्लुएन्सर्सचा खूप मोठा चाहता आहे. लाखोंच्या घरात याइन्फ्लुएन्सर्सचे फॉलोअर्स असून त्यांच्यातही स्पर्धा सुरु असलेली पाहायला मिळते. सोशल मीडियावरुन ते थेट चित्रपटांमध्ये महत्त्वपूर्ण भूमिका मिळण्यापर्यंतचा या इन्फ्लुएन्सर्सचा प्रवास सुरु झाला आहे. (Prasad Oak On Influencers)
केवळ फॉलोअर्स जास्त आहेत म्हणून या इन्फ्लुएन्सर्सला मालिका, चित्रपटात अभिनयाची संधी मिळते. ही बाब अनेकदा कलाकार मंडळींना खटकली आहे. यावरुन बऱ्याच कलाकारांनी भाष्यही केलं आहे. अशातच आता अभिनेता, दिग्दर्शक प्रसाद ओक याने देखील या मुद्द्यावर त्याचं असं परखड मत मांडलं आहे. अभिनेता म्हणून प्रसादने नेहमीच प्रेक्षकांच्या मनावर राज्य केलं. इतकंच नव्हे तर उत्तम दिग्दर्शक म्हणूनही प्रसादने अभिनयसृष्टीत छाप पाडली आहे. प्रसादने नुकतीच एका युट्युब चॅनेलला मुलाखत दिली.
प्रसादने ‘कॉकटेल स्टुडिओ’ ‘या युट्युब चॅनेलला मुलाखत दिली. यावेळी त्याने अनेक विषयांवर भाष्य केलं. यावेळी बोलताना त्याने केवळ फॉलोर्सच्या जोरावर इन्फ्लुएन्सर्सला काम मिळतं, या मुद्द्यावर स्पष्ट मत मांडलं आहे. या मुद्द्यावर बोलताना प्रसाद म्हणाला, “दुर्दैवी आहे. अत्यंत थर्ड क्लास क्राइटेरिया आहे हा की ज्यांचे फॉलोअर्स जास्त तो चांगला किंवा मोठा अ‍ॅक्टर्स आहे. हा हिंदीवाल्यांनी आणलेला ट्रेंड आहे; जो मराठीत रुजू पाहतोय. पण तो वेळीच ठेचला गेला पाहिजे आणि तो ठेचला जाईलच”.
पुढे तो म्हणाला, “जोपर्यंत मराठीमध्ये परेश मोकाशी, आदित्य सरपोतदार, प्रवीण तरडे, मी स्वतः, रवी जाधव, विजू माने, अभिजीत पानसे अशी अनेक नावं घेता येतील माझ्या सहकारी मित्रांची जे परफॉर्मन्सवर विश्वास ठेवणारे दिग्दर्शक आहेत. तोपर्यंत या फॉलोअर्सच्या कॅटगिरीचा मराठीत काही फार फरक पडेल किंवा त्याने काही खूप मोठा बदल होईल असं मला अजिबात वाटतं नाही. हिंदीवाले ते करत आहेत. पण अखेर तो अ‍ॅक्टर्स म्हणून कसा आहे हे कळल्यानंतर ते स्वतः त्याला अनफॉलो करत असतील, असं मला वाटतं आहे”.
