मराठमोळा अभिनेता श्रेयस तळपदे याला हृदयविकाराचा झटका आल्याच्या वृत्ताने सगळ्यांच्याच काळजाचा ठोका चुकला होता. श्रेयसला १४ डिसेंबर (गुरुवारी) रोजी शूटिंग वरुन घरी येताच हृदयविकाराचा झटका आला. यानंतर, अभिनेत्याला मुंबईमधील बेलेव्ह्यू रुग्णालयात दाखल करण्यात आले. तिथे त्याच्यावर अँजिओप्लास्टी करण्यात आली. त्याच्या तब्येतीत सुधारणा होत असल्यामुळे त्याला लवकरच रुग्णालयातून डिस्चार्ज मिळेल असे म्हटले जात होते, परंतु अद्याप त्याला डिस्चार्ज मिळालेला नाही. अशातच आता स्वतः अभिनेत्यानेच त्याच्या तब्येतीची माहिती दिली आहे. (Shreyas Talpade Health Update)
श्रेयसला हृदयविकाराचा झटका आल्याची बातमी आल्यानंतर त्याचे चाहते काळजीत पडले. त्याच्या उत्तम स्वास्थ्यासाठी ते प्रार्थना करत आहेत. दरम्यान, आता खुद्द अभिनेत्याने त्याच्या तब्येतीबाबत अपडेट दिली आहे. अभिनेत्याने ‘झूम’ला दिलेल्या वृत्तानुसार असे म्हटले आहे की, “तुमच्या सर्वांच्या पाठिंबा व प्रार्थनांसाठी धन्यवाद. मी आता थोडा बरा आहे. काळजी नसावी”. यादरम्यान, अभिनेत्याने असेही सांगितले आहे की तो अद्याप घरी गेला नसून अजूनही रुग्णालयातच आहे.
श्रेयसच्या तब्येतीबाबत त्याच्या पत्नीने सोशल मीडियावर पोस्ट करत अपडेट दिली होती. यात तिने श्रेयसच्या तब्येतीचे वृत्त कळताच अनेकांनी दाखवलेल्या काळजी, प्रेम व प्रार्थनेसाठी कुतज्ञता व्यक्त केली होती. डॉक्टरांनी वेळेवर तातडीने केलेल्या मदतीसाठी व त्यांनी दाखवलेल्या कौशल्याबद्दल तिने धन्यवाद म्हटले होते. तसेच श्रेयसच्या तब्येतीत आता सुधारणा होत असल्याचेही तिने या पोस्टद्वारे सांगितले होते.
दरम्यान, मराठीतील अनेक कलाकार मंडळींनीही त्याच्या तब्येतीवर चिंता व्यक्त केली होती. अभिनेत्री रेशम टिपणीसने “काळजी घे. श्रेयसला लवकरच बरं वाटेल. गणपती बाप्पा त्याची काळजी घेत आहे” असं म्हटलं होतं. तर अभिनेत्री सुकन्या मोने यांनीही “श्री स्वामी समर्थ” असं म्हणत त्याच्या तब्येतीसाठी देवाकडे प्रार्थना केली आहे. तसेच श्रेयसच्या अनेक चाहत्यांनीही कमेंटद्वारे त्याला “लवकर बरा हो” असं म्हटलं आहे. त्यामुळे श्रेयसच्या प्रकृतीत लवकर सुधारणा व्हावी यासाठी त्याचे सगळेच चाहते व कुटुंबीय प्रार्थना करत आहेत.
