मराठी सिनेसृष्टीत गेल्या काही दिवसांपासून लग्नसराई सुरु आहे. प्रथमेश परब, तितीक्षा तावडे, पूजा सावंत व नुकतीच योगिता चव्हाण या कलाकार मंडळींनी आपल्या जोडीदाराबरोबर लग्नगाठ बांधून आयुष्याची नवीन सुरुवात केली आहे. अशातच आता छोट्या पडद्यावरील आणखी एक लोकप्रिय जोडी विवाहबंधनात अडकणार आहे आणि ही जोडी म्हणजे अभिनेता शुभंकर एकबोटे व अभिनेत्री अमृता बने. शुभंकर-अमृता यांचा नोव्हेंबर महिन्यात मोठ्या थाटामाटात साखरपुडा केला होता. त्यानंतर आता त्यांच्या लग्नाची लगबग सुरु झाली आहे.
लग्नाआधी होणाऱ्या नवरा-नवरीचे कौतुक म्हणून केळवण करण्याची पद्धत असते. त्यामुळे आता शुभंकर व अमृता यांच्या केळवणालादेखील सुरुवात झाली आहे. नुकतेच शुभंकर-अमृताचे पहिले केळवण साजरे करण्यात आले. हॅशटॅग अशुचं केळवण असे म्हणत त्यांनी पहिल्या केळवणाचा खास व्हिडीओ सोशल मीडियावर शेअर केला आहे. अमृताच्या आईने या खास केळवणाचे आयोजन केले असून श्रीखंड-पुरीचा खास बेत केला होता. तसेच ताटाभोवती आकर्षक रांगोळी व फुलांची आरास केली असल्याचे पाहायला मिळत आहे. तसेच यावेळी त्यांच्या घरीही खास सजावट करुन शुभंकर-अमृताचे स्वागत करण्यात आले.
शुभंकर-अमृता यांनी शेअर केलेल्या या व्हिडीओखाली त्यांच्या अनेक चाहत्यांनी त्यांना हा व्हिडीओ आवडला असल्याचे म्हटले आहे. तसेच त्यांना शुभंकर-अमृताची ही जोडीही आवडली असल्याचे म्हटले आहे. शुभंकर-अमृता दोघेही ‘कन्यादान’ या मालिकेतून एकत्रित काम करत होते. रील लाईफमध्ये लोकप्रिय जोडी म्हणून ओळखल्या जाणाऱ्या अमृता व शुभंकर यांनी त्यांच्या रिअल लाईफमध्येही लग्न करण्याचा निर्णय घेतला आहे.
दरम्यान, ‘कन्यादान’ मालिकेत अमृता बनेने वृंदा आणि शुभंकर एकबोटेने राणा हे पात्र साकारले आहे. या मालिकेच्या सेटवरच अमृता-शुभंकर यांची पहिल्यांदा भेट झाली. हळूहळू त्यांच्यात मैत्री झाली आणि मैत्रीचे रुपांतर प्रेमात झाले आणि आता त्या दोघांनी लग्न करण्याचा निर्णय घेतला आहे. त्यामुळे त्यांच्या लग्नासाठी त्यांचे अनेक चाहतेही चांगलेच उत्सुक आहेत.