गेले पाच दशक मराठीसह हिंदी सिनेसृष्टीत काम करत प्रेक्षकांच्या मनावर राज्य करणारे सर्वांचेच लाडके अभिनेते म्हणजे अशोक मामा. वयाच्या पंच्याहत्तरीनंतर देखील आपल्या कामाचे तारुण्य जपत आजही अनेकांचे मनोरंजन करत आहेत. त्यांच्या लोभस स्वभावामुळे ते सर्वांनाच आपले वाटतात. अशोक व निवेदिता ही जोडी गेली अनेक वर्ष प्रेक्षकांची आवडती जोडी आहे. या जोडीची ऑनस्क्रीन केमिस्ट्री प्रेक्षकांना आवडली होतीच पण त्यांची ऑफस्क्रीन केमिस्ट्रीदेखील प्रेक्षकांना आवडते. (Ashok Saraf And Nivedta Saraf In Sur Nava Dhyas Nava Show)
अशोक सराफ व निवेदिता सराफ हे दोघे कलर्स मराठी वरील ‘सुर नवा ध्यास नवा’ या कार्यक्रमात हजेरी लावणार आहेत. नुकताच याचा एक प्रोमो समोर आला असून या प्रोमोमध्ये अशोक मामा व निवेदिता सराफ यांचा कॉमेडी अंदाज पाहायला मिळत आहे. कलर्स मराठीच्या अधिकृत इन्स्टाग्राम अकाऊंटवरुन हा व्हिडीओ शेअर करण्यात आला आहे. ज्यात त्यांच्यात एक खेळ खेळण्यात आला. तेव्हा या खेळादरम्यान झालेली मजामस्ती या व्हिडीओत पाहायला मिळत आहे.
यावेळी कार्यक्रमाची निवेदिका रसिका सुनील मामांना निवेदिता यांच्याबद्दल एक प्रश्न विचारते. रसिका म्हणते, “निवेदिता यांचं सर्वात आवडतं पर्यटन स्थळ कोणतं?” यावर निवेदिता यांच्या हातात दिलेल्या फळ्यावर त्या लंडन असं लिहितात. मात्र अशोक मामा त्यांच्या विनोदीशैलीत उत्तर देत त्यांच्या हातातील फळ्यावर ‘स्वयंपाकघर’ असं लिहितात. त्यांच्या या उत्तरावर परीक्षक, स्पर्धक व उपस्थितांसह सगळेच आश्चर्यचकित होतात आणि मामांनी हे विचित्र उत्तर का दिलं असा विचार करू लागतात.
इतक्यात आपलं उत्तर कसं योग्य आहे हे सांगताना मामा म्हणतात, “तिचं आवडतं ठिकाण स्वयंपाकघर आहे. कारण ती तिथे गेली की बाहेरच येत नाही. बाहेर येते आणि पुन्हा आत जाते. त्यामुळे ते एक प्रकारचे पर्यटनस्थळचं झालं ना?” त्यांच्या या उत्तरावर एकच हास्यकल्लोळ होतो. मामांच्या या उत्तरावर निवेदितादेखील हसतात आणि त्यांच्या या विनोदला दाद देतात. दरम्यान या व्हिडीओखाली चाहत्यांनीही कमेंट्स करत प्रतिसाद दिला आहे. तसेच अशोक व निवेदिता यांच्या नात्यात किती मोकळीक आहे हे दिसून येते आणि त्यांच्या या नात्याची प्रशंसादेखील केली आहे.
