अभिनेत्री सायली संजीव एका चित्रपटामुळे विशेष चर्चेत आली आहे. सध्या ‘झिम्मा २’ चित्रपटाची सर्वत्र चर्चा सुरु आहे. या चित्रपटात सायली महत्त्वपूर्ण भूमिका साकारताना दिसत आहे. सायलीच्या या चित्रपटाने बॉक्स ऑफिसवर चांगलाच गल्ला जमवलेला पाहायला मिळत आहे. या चित्रपटाला प्रेक्षकांचाही भरभरून प्रतिसाद मिळत आहे. सायली सध्या चित्रपटाच्या प्रमोशनमध्ये व्यस्त असल्याचं पाहायला मिळत आहे. (Sayali Sanjeev On Father)
‘झिम्मा २’ या सिनेमाच्या प्रमोशनमध्ये व्यग्र असणारी सायली एका व्यक्तीच्या आठवणीत मात्र खूप भावुक झाली आहे. ही व्यक्ती म्हणजे तिचे बाबा. अभिनेत्रीच्या वडिलांचे दोनवर्षापूर्वी ३० नोव्हेंबर रोजी निधन झाले. सायलीच्या वडिलांना जाऊन आज दोन वर्ष पूर्ण झाली आहेत. मात्र सायलीच्या मनातील दु:ख आजही ताजं आहे. तिने तिच्या लाडक्या बाबासाठी सोशल मीडियावरून एक पोस्ट शेअर केली आहे.
सायलीने तिच्या लाडक्या बाबाचा हातात हात घेतलेला फोटो शेअर केला आहे. या पोस्टला तिने “माझं तुझ्यावर खूप प्रेम आहे बाबा’ असं कॅप्शन दिलं आहे. तिच्या या पोस्टवर अनेकांनी कमेंट करत सायलीला दिलासा देण्याचा प्रयत्न केला आहे. अभिनेता समीर चौघुलेने सायलीच्या या पोस्टवर कमेंट करत, “खूप प्रेम सायली, ते तुझ्याबरोबर कायम आहेत” असं म्हणत तिला धीर दिला आहे. सायलीच्या या भावुक करणाऱ्या पोस्टवर अनेक चाहत्यांनी कमेंट करत तिला खंबीर राहण्याचा सल्ला दिला आहे. तसेच तुझे वडील कायम तुझ्याबरोबर आहेत अशा कमेंटही केल्या आहेत.
अभिनेत्री सायली संजीवच्या वडिलांचे निधन दोन वर्षांपूर्वी कर्करोगाशी सामना करताना झाले. वडिलांच्या आठवणी जपण्यासाठी सायलीने तिच्या बाबांचं नाव असणारी गोधडीही शिवून घेतली आहे. याशिवाय अभिनेत्रीने तिच्या बाबांसाठी खास टॅटूही गोंदवून घेतला आहे. सायली व तिच्या वडिलांचं घट्ट बॉण्डिंग होतं. नेहमीच ती तिच्या लाडक्या बाबासाठी काही ना काही पोस्ट शेअर करत असते.