सनी देओल व अमिषा पटेलचा ‘गदर २’ चित्रपट सध्या बॉक्स ऑफिसवर चांगलाच धुमाकूळ घालत आहे. या चित्रपटाने आतापर्यंत ४०० कोटी रुपयांपेक्षा अधिक कमाई केली आहे. अजूनही हा चित्रपट पाहण्यासाठी प्रेक्षक चित्रपटगृहांबाहेर गर्दी करत आहेत. दरम्यान हा चित्रपट पाहण्यासाठी थिएटरमध्ये पोहोचलेल्या एका तरुणाबाबत धक्कादायक बाब समोर आली आहे. ‘गदर २’ पाहण्यासाठी चित्रपटगृहात पोहोचलेल्या तरुणाचा हृदय विकाराच्या झटक्याने निधन झालं आहे. याबाबतचा एक व्हिडीओ समोर आला आहे.
उत्तर प्रदेशमधील एका चित्रपटगृहामध्ये ही घटना घडली. उत्तर प्रदेशातील लखीमपूर खेरी येथील थिएटरमध्ये ३२ वर्षीय तरुण चित्रपट पाहण्यासाठी पोहोचला. फोनवर बोलत तो पायऱ्या चढत होता. दरम्यान पायऱ्या चढत असताना तरुण खाली कोसळला. यादरम्यानचा संपूर्ण प्रकार सीसीटीव्ही कॅमेऱ्यामध्ये कैद झाला आहे. मृत तरुणाचं नाव अक्षत तिवारी असं आहे. अक्षत अचानक खाली कोसळल्यामुळे चित्रपटगृहामध्येही एकच गोंधळ उडाला.
शनिवारी (२६ ऑगस्ट) सायंकाळी ७.५०च्या सुमारास हा संपूर्ण प्रकार घडला. अक्षतला खाली कोसळताना इतरांनी पाहिलं. दरम्यान त्याच्या मदतीसाठी उपस्थित धावून आले. तेथील अतिरिक्त पोलीस अधिक्षक नायपाल सिंह यांनी या तरुणाच्या निधनाची संपूर्ण माहिती दिली. ते म्हणाले, “अक्षत तिवारीचा फोन अनलॉक होता. दरम्यान तेथील सुरक्षारक्षकांनी त्याच्या कुटुंबियांना फोन करुन या घटनेबाबत कळवलं. त्याला लगेचच खासगी रुग्णालयात दाखल करण्यात आलं”.
लखीमपुर खीरी के फन मॉल में फिल्म देखने गये 32 वर्षीय अक्षत तिवारी की हार्ट अटैक आने पर हुई मौत। महेवागंज में रजत मेडिकल स्टोर के नाम से दवाई की दुकान चलाते थे अक्षत तिवारी। सदर कोतवाली के फन मॉल की घटना। pic.twitter.com/6QkaJHVbXK
— SANJAY TRIPATHI (@sanjayjourno) August 27, 2023
“दरम्यान रुग्णालयामध्ये नेताच डॉक्टरांनी त्याला मृत घोषित केलं. सध्यातरी या संपूर्ण घटनेचा पोलीस तपास करत आहेत”. अक्षत रजत मेडिकल स्टोअर चालवायचा. त्याच्या निधनानंतर अक्षतच्या संपूर्ण कुटुंब कोलमडून गेलं आहे. सोशल मीडियावर या तरुणाच्या निधनाचं सीसीटिव्ही फुटेज व्हायरल होत आहे. व्हिडीओ पाहिल्यानंतर नेटकऱ्यांनीही हळहळ व्यक्त केली आहे.
