सध्या सिनेसृष्टीतील बरेच कलाकार घर घेतल्याची आनंदाची बातमी चाहत्यांसह शेअर करताना दिसत आहेत. बऱ्याच कलाकारांचं घर घेण्याचं स्वप्न पूर्ण झालं आहे. सोशल मीडियावरून याबाबतची पोस्ट वा फोटो शेअर करून कलाकारांनी ही गुडन्यूज शेअर केली आहे. अशातच आता एका मराठमोळ्या अभिनेत्रीने नवं घर घेतलं असल्याची खुशखबर चाहत्यांसह शेअर केली. ही मराठमोळी अभिनेत्री म्हणजे छोटा पडदा गाजवणारी मयुरी वाघ. (Mayuri Wagh New Home)
झी मराठी वाहिनीवरील ‘अस्मिता’ या मालिकेमुळे अभिनेत्री मयुरी वाघ घराघरांत लोकप्रिय झाली. या मालिकेमुळे मयुरी वाघला विशेष लोकप्रियता मिळाली. अनेक मराठी मालिकांमध्ये महत्त्वपूर्ण भूमिका साकारत तिने प्रेक्षकांच्या मनात घर केलं. आजवर अनेक मालिका मयुरीने तिच्या नावे केल्या आहेत. मयुरी अभिनयासह तिच्या सोशल मीडियावरील वावरामुळेही लोकप्रिय आहे. सोशल मीडियावर ती बऱ्यापैकी सक्रिय असते. अशातच सोशल मीडियावरून अभिनेत्रीने तिच्या चाहत्यांसह आनंदाची बातमी शेअर केली आहे.
मयुरीने नुकतंच तिच्या स्वप्नातील नवं घर घेतलं असल्याची आनंदाची बातमी तिच्या इंस्टाग्राम अकाऊंटवरून शेअर केली आहे. गृहप्रवेश व वास्तुशांतीचे काही खास फोटो शेअर करत अभिनेत्रीने गुडन्यूज शेअर केली. “माझ्या स्वप्नांच्या यादीमधील आणखी एक गोष्ट मी पूर्ण करून दाखवली. माझं स्वप्न मी घराच्या रुपात साकार केलं” असं कॅप्शन मयुरीने या फोटोंना दिलं आहे. या फोटोंना मयुरीने नवीन घर, नवी सुरूवात, कृतज्ञता, आनंदी आयुष्य असे हॅशटॅग्स दिले आहेत.
मयुरीने शेअर केलेल्या या पोस्टवर सिनेविश्वातील अनेक कलाकार मंडळींनी तिच्यावर शुभेच्छांचा वर्षाव केला आहे. तर अभिनेत्रींच्या चाहत्यांनी तिच्या या पोस्टला लाईक्स व कमेंट केल्या आहेत. मयुरी सिनेसृष्टीतील तिच्या अभिनयासह तिच्या खासगी आयुष्यामुळेही चर्चेत आली होती. मयुरीने २०१७ मध्ये अभिनेता पियुष रानडेसह लगीनगाठ बांधली होती. परंतु, लग्नानंतर काही वर्षांतच दोघांनी घटस्फोट घेतला आणि ते वेगळे झाले. यानंतर आता दोन दिवसांपूर्वीच पियुष रानडे अभिनेत्री सुरुची अडारकरसह विवाहबंधनात अडकला.