Tanushree Dutta Statement on Industry : तनुश्री दत्ता नेहमीच विविध कारणांमुळे चर्चेत असते. दरम्यान, ती पुन्हा एकदा चर्चेत आली असून यावेळी तिने चित्रपटसृष्टीतील फसवणूक आणि नवोदित कलाकारांच्या शोषणाबाबत स्पष्ट आणि गंभीर भाष्य केलं आहे. नुकत्याच दिलेल्या एका मुलाखतीत तिने मनोरंजनविश्वाच्या पडद्यामागे घडणाऱ्या वास्तवावर प्रकाश टाकत अनेक धक्कादायक गोष्टी सांगितल्या.
‘मेरी सहेली’ला दिलेल्या मुलाखतीत तनुश्रीने सांगितले की, अनेक नवोदित कलाकारांना मोठ्या संधींची आश्वासनं देऊन त्यांना जाळ्यात ओढलं जातं.“तू खूप सुंदर आहेस, तू अभिनेत्री होऊ शकतेस,” अशा गोड बोलांनी त्यांचा विश्वास जिंकून घेतला जातो. आणि नंतर त्यांना कठीण परिस्थितीत अडकवलं जातं,” असं ती म्हणाली. तनुश्री पुढे म्हणाली की, लहानपणी पालक मुलांना अनोळखी लोकांपासून सावध राहण्याचा सल्ला देतात, पण मोठं झाल्यावर अनेकजण तो विसरतात. “लोक तुमच्या स्वप्नांचा आणि महत्त्वाकांक्षेचा गैरफायदा घेतात. ते तुमच्या आशांशी खेळतात,” असंही तिने नमूद केलं. मनोरंजनसृष्टी प्रेक्षकांचं भरभरून मनोरंजन करत असली, तरी या चमकदार पडद्यामागे अनेक कठोर आणि कटू वास्तव लपलेलं असतं. इंडस्ट्रीमध्ये मोठ्या संख्येने मुलं-मुली आपल्या स्वप्नांसाठी येतात; मात्र काही जण त्यांचा गैरफायदा घेतात, त्यांना मानसिक आणि भावनिक त्रास सहन करावा लागतो आणि शेवटी त्यांना एकटं सोडलं जातं, असा गंभीर आरोप तनुश्रीने केला. (Tanushree Dutta Statement on Industry)
आणखी वाचा – ‘बिग बॉस’मधून प्राजक्ता शुक्रेची एक्झिट, गायिकेचा गेम दिसलाच नाही म्हणून…; सोशल मीडियावर चर्चा
“माझ्याकडे बोलण्यासाठी एक व्यासपीठ आहे, म्हणून मी या विषयावर बोलते आहे. जर माझ्या बोलण्यामुळे काही जण सावध झाले, तर कदाचित काही जीव वाचू शकतील,” असंही ती म्हणाली. तनुश्रीच्या या विधानांमुळे पुन्हा एकदा मनोरंजनसृष्टीतील सुरक्षितता, नवोदित कलाकारांचे प्रश्न आणि पडद्यामागील वास्तव यावर चर्चा सुरू झाली आहे. (Tanushree Dutta Statement on Industry)
