मराठीमधील बहुचर्चित चित्रपटांपैकी एक चित्रपट म्हणजे ‘बॉईज’. या चित्रपटाच्या पहिल्या तीन भागांना प्रेक्षकांचा भरभरुन प्रतिसाद मिळाला. बॉक्सऑफिसवरही चित्रपटांच्या तिन्ही भागांनी उत्तम कमाई केली. आता या चित्रपटाचा चौथा भाग लवकरच प्रेक्षकांच्या भेटीला येणार आहे. ‘बॉईज ४’ चित्रपटाचा ट्रेलरही आता प्रदर्शित झाला आहे. या ट्रेलरला सध्या प्रेक्षकांचा बराच प्रतिसाद पाहायला मिळत आहे. ‘महाराष्ट्राची हास्यजत्रा’ फेम निखिल बनेही या चित्रपटामध्ये महत्त्वाच्या भूमिकेमध्ये दिसणार आहे.
‘बॉईज ४’ हा निखिलचा पहिलाच मराठी चित्रपट. या चित्रपटासाठी तो बराच उत्सुक आहे. ट्रेलर प्रदर्शित झाल्यानंतर प्रेक्षकांच्या मिळत असलेल्या प्रतिक्रिया पाहून निखिल भारावून गेला. ‘बॉईज ४’चं बरंच चित्रीकरण लंडनमध्ये झालं आहे. मात्र निखिल लंडनमध्ये चित्रीकरणासाठी नव्हता. याचं त्याला वाईट वाटतं. ‘बॉईज ४’च्या ट्रेलर लाँच सोहळ्यादरम्यान ‘इट्स मज्जा’ला दिलेल्या मुलाखतीत त्याने याबाबत भाष्य केलं.
निखिलला चित्रपटाच्या चित्रीकरणादरम्यान आलेल्या अनुभवाबाबत विचारण्यात आलं. तेव्हा त्याने लंडनच्या चित्रीकरणाचा उल्लेख केला. तो म्हणाला, “मी लंडनला चित्रीकरणासाठी नव्हतो. पण याचं मला थोडं वाईट वाटलं. चित्रपटाची संपूर्ण टीम लंडनला गेली होती. लंडनला गेल्यानंतर संपूर्ण टीमला असं वाटत होतं की, बनेही आपल्याबरोबर पाहिजे होता. खूप मजा-मस्ती केली असती”.
“गौरव मोरे सतत मला फोन करायचा. तू लंडनला यायला पाहिजे होतं मजा आली असती असं म्हणायचा. या चित्रपटामध्ये लंडनशी माझं थोडं फार कनेक्शन आहे. पण ते वेगळ्या माध्यमातून आहे. लंडनशी माझं कसं कनेक्शन आहे हे तुम्हाला चित्रपट पाहिल्यानंतरच लक्षात येईल”. विशाल देवरुखकर दिग्दर्शित या चित्रपटात ऋतिका श्रोत्री, अभिनय बेर्डे, निखील बने, गौरव मोरे, रितुजा शिंदे, जुई बेंडखळे आदी कलाकार काम करताना दिसतील. २० ऑक्टोबरला हा चित्रपट चित्रपटगृहांमध्ये दाखल होणार आहे.