‘झी मराठी’ वाहिनीवरील ‘माझी तुझी रेशीमगाठ’ मालिकेतून घराघरात पोहोचलेली अभिनेत्री म्हणजे प्रार्थना बेहेरे. प्रार्थनाने आजवर विविध, चित्रपट, मालिकांमध्ये काम करत प्रेक्षकांची मनं जिंकली आहेत. ती सोशल मीडियावर बरीच सक्रिय असते. कामासह ती तिच्या वैयक्तिक आयुष्यातील फोटोज् व व्हिडिओ इन्स्टाग्रामवर शेअर करत असते. नुकतंच तिने स्वतःचं युट्युब चॅनेल सुरु केलं आहे. ज्यामधून ती तिच्या आयुष्यातील अपडेट सविस्तर स्वरूपात चाहत्यांना सांगताना दिसते. नुकतंच ती अलिबागमधील घरी राहायला गेली आहे. तेथील व्हिडिओ तिने तिने युट्युबवर शेअर केला. (prarthana behere has left Mumbai)
यात प्रार्थना अलिबागला घेतलेल्या नवीन घराबद्दल भरभरून बोलताना दिसते. “तुमचं सर्वांचं माझ्या घरात खूप स्वागत”, असं म्हणत तिने सर्वांचं स्वागत केलं. या व्हिडिओत तिने नविन घराची झलक दाखवली. तिच्या घराच्या सुरुवातीला बाप्पा मोदकाला मिठी मारुन बसलेली पाहायला मिळाला. घराच्या आजूबाजूला हिरवगार झाडं आहेत त्यामुळे वातावरण अगदी रम्य आहे. या घराबद्दल बोलताना प्रार्थना सांगते, “मी आणि माझ्या नवऱ्याने हे घर खूप प्रेमाने हे घर बनवलं आहे. त्यामुळे ते माझ्या ह्रदयाचा खूप जवळ आहे. हे माझं आयुष्य आहे”, असं म्हणत तिने हा व्हिडिओ शेअर केला. ‘I Me My Self मी माझं जग आणि…’, असं शीर्षक देत तिने हा व्हिडिओ पोस्ट केला आहे.
या व्हिडिओत तिला प्रश्न विचारला की मुंबई सोडून अलिबागला कायमचं राहायला आली आहेस तर किती जड गेलं? यावर प्रार्थनाने सांगितलं, “सुरुवातीला काही दिवसांत मला थोडा त्रास झाला. कारण सगळं काम मुंबईत आहे. ते सगळं सोडून कायमचं कसं इकडे राहायला यायचं ? कसं करेन मी हे सगळं? असे सगळे प्रश्न होते. पण हे सगळं खूप सोपं आहे. कारण घरापासून १५ मिनिटांवर मांडवा आहे”.
प्रार्थनाने पुढे सांगितलं “जिथून जेट्टी मिळते. बोट व रोरो देखील असतात. रोरो फेरीत गाडी घालून ४५ मिनीटांत मुंबईत पोहोचता येतं. म्हणजे एकंदरीत एका तासात आपण मुंबईत पोहोचतो. साधारण मुंबईच्या ट्राफिकमध्ये फिरायला तेवढाच वेळ जातो”, असं सांगत तिने या व्हिडिओत घराचं भरभूरून कौतुक केलं आहे.
