विनोदी भूमिका साकारत प्रेक्षकांच्या मनावर अधिराज्य गाजवणाऱ्या अभिनेत्रींपैकी एक म्हणजे विशाखा सुभेदार. मराठी मालिका, चित्रपट, नाटक अशा तिन्ही माध्यमांमध्ये सध्या त्या काम करत आहेत. कलाक्षेत्रात काम करत असताना खासगी आयुष्यात मात्र विशाखाला स्वतःला फारसा वेळ देता येत नाही. कोणत्याही सणांनाही ती तिच्या कामामध्ये व्यग्र असते. याची विशाखाला खंत वाटते. दिवाळी सण जवळ येत असताना तिने काही जुन्या आठवणींना उजाळा दिला आहे.
कलाकारांना कामामुळे सण कुटुंबासह मनाप्रमाणे साजरे करता येत नाहीत. विशाखाचंही अगदी तसंच आहे. तरीही वेळात वेळ काढत ती कुटुंबियांबरोबर राहण्याचा प्रयत्न करते. याचबाबत ‘इट्स मज्जा’बरोबर संवाद साधताना तिने काही आठवणी सांगितल्या. तसेच दिवाळी पाडव्याबाबतही भाष्य केलं. विशाखा म्हणाली, “मला माझ्या नवऱ्याने दिवाळी पाडव्याला एक ड्रेस घेतला होता. त्यानंतर काही वर्ष आमचा पाडवा छान झाला”.
आणखी वाचा – कार्तिकी गायकवाडच्या ताफ्यात आणखी एका आलिशान कारची भर, कारची किंमत आहे इतकी
“सुरुवातीला या क्षेत्रामध्ये खूप स्ट्रगल होतं. पैसे वगैरे कसे कमवायचे याबाबतही प्रश्न होता. नवीन लग्न झाल्यावर नंदा घरी येतात तेव्हा असं वाटतं की, आपल्याकडून त्यांना काही द्यावं. त्यामुळे त्यांच्यासाठी अधिक गिफ्ट्स तयार केले. माझे अनेक पाडवे मी सेलिब्रेट केलेच नाहीत. आपल्यासाठी गिफ्ट वगैरे घेणं सगळं ठिक आहे. पैसा येईल तेव्हा आपण आपल्यासाठी गिफ्ट खरेदी करुया असं मी ठरवलेलं. एका पाडव्याला नवऱ्याने मला सोन्याचे कानातले दिले”.
“काही पाडव्याचे क्षण माझ्या लक्षात आहेत. नवऱ्यासाठी अनेक पाडवे शांतच होते. कारण खिसा, दिवाळी, दिवाळ निघणं हे कायम होतंच. पण आता पाडवा म्हटलं तर नवऱ्याला आडवं पाडायचं, त्याचा खिसा रिकामा करायचा हे माझं सुरुच आहे. मला सण साजरे करायला फार कमी वेळ मिळतो”. शिवाय विशाखा दिवाळी फराळाबाबत म्हणाली, “दिवाळीला फराळ पण इतर दिवशी तेच पदार्थ चकणा म्हणून असतात”. वेळ मिळेल तसं विशाखा दिवाळीचा फराळही घरीच तयार करते.
