आजवर मराठी चित्रपटांसह हिंदी सिनेसृष्टीत आपल्या अभिनयाची छाप पाडणारा कलाकार म्हणजे सिद्धार्थ जाधव. मराठीसह हिंदी सिनेसृष्टीतही सिद्धार्थने अभिनयाच्या जोरावर स्वतःचा असा चाहतावर्ग निर्माण केला. सर्वांना हसवत खेळवत पडद्यावर दिसणारा, सेटवरील वातावरण हलकं करणारा अशा या सिद्दार्थ जाधवचा इथवरचा प्रवास काही सोप्पा नव्हता. आज या प्रसिद्ध अभिनेत्याचा वाढदिवस आहे. आणि त्याच्या वाढदिवसानिमित्त ‘स्टार प्रवाह’ वाहिनीकडून ‘आता होऊ दे धिंगाणा’च्या मंचावर त्याचा वाढदिवस दणक्यात साजरा करण्यात आला. (Siddharth Jadhav Birthday)
‘स्टार प्रवाह’ वाहिनीवरील दोन मालिका म्हणजेच ‘तुझेच मी गीत गात आहे’ आणि ‘मन धागा धागा जोडते नवा’ या मालिकेच्या कलाकारांनी ‘आता होऊ दे धिंगाणा’ या कार्यक्रमाच्या मंचावर हजेरी लावली होती. यावेळी मालिकेतील कलाकारांच्या उपस्थितीत हा सिद्धार्थचा वाढदिवस साजरा करण्यात आला. यावेळी मालिकेतील कलाकारांनी ‘स्टार प्रवाह’ची पारंपारिक परंपरा फॉलो करत आधी सिद्धूचं औक्षण केलं. त्यानंतर त्याने केक कापून त्याचा वाढदिवस साजरा केला. यावेळी सिद्धार्थचा प्रवास ऐकून उपस्थित कलाकारांच्या डोळ्यात पाणी आलं.
‘तुझेच मी गीत गात आहे’ मालिकेतील अभिनेता अभिजीत खांडकेकरने सिद्धूचं कौतुक करत म्हटलं की, “सर्वसामान्य कुटुंबातूनआलेला मुलगा स्वबळाने, स्वमेहनतीने, आपला आई वडिलांवर प्रचंड प्रेम करत, आपली आवड जोपासत साऱ्या प्रेक्षकांना पराकोटीचा आनंद देतो तो म्हणजे आपला सिद्धू. सिद्धू तुला कल्पनाही नसेल की तू सहज म्हणून करत असणाऱ्या कित्येक गोष्टी आहेत ज्या आज कितीतरी लोकांना आनंद मिळवून देतात.” यापुढे बोलताना तो असंही म्हणाला, “सिद्धू कधीच दुखी, नाराज दिसला नाही. प्रत्येक कलाकाराने आपल्या आयुष्यातील दुःख, टेन्शन ही कॅमेरा रोल व्हायच्या आधी बाहेर टाकून यावीत आणि त्याच मूर्तिमंत उदाहरण सिद्धू आहे. त्याच्या आयुष्यात काय चाललंय काय नाही हे आम्हाला कधीच माहित नसत.”
यावेळी सिद्धार्थ म्हणाला, “प्रत्येक माणसाच्या आयुष्यात वेगवेगळे टप्पे असतात. माझ्या आयुष्यातले हे टप्पे मी खूप एन्जॉय करतो. आयुष्यात बऱ्याच गोष्टी शिकत गेलो. धडपडत गेलो, पडत गेलो पण उभा राहिलो. आनंद वाटण्याने आनंद मिळतो ही जी गोष्ट आहे, ती खूप महत्त्वाची आहे. मी नेहमीच म्हणतो, मी किती चांगला अभिनेता आहे, हे मला माहित नाही. पण मी प्रचंड नशीबवान अभिनेता आहे की मला त्या क्षणाला त्या लोकांचा सहवास मिळतो आणि माझं आयुष्य समृद्ध होतं. धन्यवाद. माझ्यासाठी हा क्षण खूप खास आहे. गेल्यावर्षी माझ्यासाठी महेश मांजरेकर केक घेऊन आले होते. माझे बाबा, दादा आणि आई आली होती. माहित नाही माझं नशीब काय आहे? पण आता माझ्याबरोबर केक कापताना स्वरा आहे.”