संपूर्ण देशभरात होळी व धूलिवंदन या सणांचा उत्साह पाहायला मिळत आहे. सामान्य लोकांपासून मोठमोठ्या कलाकारांपर्यंत सर्वांनी होलिका दहन करून होळीचा सण मोठ्या जल्लोषात साजरा केला आणि आज सगळे जण धूळवड साजरी करत आहेत. आज सर्वत्र प्रेमाचे, उत्साहाचे, आनंदाचे आणि आठवणींचे रंग उधळले जात आहेत. अनेक कलाकार सोशल मीडियावर आपले फोटो व्हिडीओ शेअर करून आपल्या धूलिवंदन सेलिब्रेशनची झलक चाहत्यांना दाखवत आहेत. याच निमित्ताने कुशल बद्रिकेने इन्स्टाग्रामवर एक खास पोस्ट शेअर केली आहे. मात्र या फोटोखाली लिहिलेल्या कॅप्शनमुळे त्याने सर्वांचे लक्ष वेधून घेतले आहे.
कुशलने त्याच्या इन्स्टाग्राम अकाऊंटद्वारे आजच्या धुळवडीचे काही खास फोटो शेअर केले आहेत. या फोटोखाली कॅप्शनमध्ये त्याने असं म्हटलं आहे की, “माझ्या आयुष्याची होळी गेली कित्येक वर्ष “फ्लॅट” संस्कृतीत पेटत आहे. पण माझी खरी होळी रंगली ती माझ्या बालपणी आमच्या “चाळीत”. माझे पप्पा पहाटे चारला उठायचे आणि दिड-दोनशे फुगे पाण्याने भरून ठेवायचे. मग रंग भरल्या पिचकारीची बंदूक आणि फुग्यांचे बॉम्ब घेऊन आमची वानरसेना दिसेल त्याच्यावर तुटून पडायची”.
यापुढे त्याने असं म्हटलं आहे की, “त्यावेळी जातीचे रंग थोडे फिकट आणि होळीचे रंग थोडे गडद होते, म्हणून कदाचित जगण्यात जे रंग उतरले त्याने अख्खं आयुष्य रंगीत करुन टाकलं. आता मुलांना फुगे भरून देताना गाठी मारून गुलाबी झालेलं ‘पप्पांचं बोट’ आपल्याच हाताला फुटलं आहे असं वाटतं आणि आता होळीत आपल्याला फुगे भरून देणारं कुणी नाही ही जाणीव बोटभर ठुसठुसत राहते.”
कुशलने शेअर केलेल्या या फोटोमध्ये कुशलसह त्याची बायको व मुलगादेखील पाहायला मिळत आहे. तसेच काही इतर मंडळीदेखील दिसत आहेत. दरम्यान, कुशलने शेअर केलेल्या फोटोला चाहत्यांनी लाईक्स व कमेंट्सद्वारे चांगलाच प्रतिसाद दिला आहे. तसेच या पोस्टखाली अनेकांनी त्याला होळीनिमित्त शुभेच्छाही दिल्या आहेत.
