मराठमोळे अभिनेते किरण माने नेहमीच कोणत्या ना कोणत्या कारणामुळे चर्चेत असतात. विशेष म्हणजे विविध विषयांवर बेधडकपणे मत मांडण्यात हा कलाकार कधीच मागे हटत नाही. त्यांची ही धाडसी वृत्ती कित्येक प्रेक्षकांना आवडते तर काहींना खटकते. बरेचदा या कलाकारालाही ट्रोलिंगचा सामना करावा लागतो मात्र ट्रोलर्सला सडेतोड उत्तर देत ते नेहमीच भाष्य करतात. किरण माने यांचा स्वतःचा असा खूप मोठा चाहतावर्ग आहे. नेहमीच ते त्यांच्या चाहत्यांच्या संपर्कात राहत असतात. नुकतीच एक फेसुबक पोस्ट शेअर करत किरण माने यांनी त्यांच्या अनोख्या चाहत्यांच्या भेटीबद्दल भाष्य केलं आहे. (Kiran Mane Shared Fan Moment)
किरण माने यांनी त्यांच्या या स्पेशल चाहत्यांबरोबरचे फोटो शेअर करत एक पोस्ट लिहिली आहे. ही पोस्ट सध्या साऱ्यांचं लक्ष वेधून घेत आहे. काही तृतीयपंथी मंडळींनी किरण माने यांची भेट घेतली. त्यांच्या भेटीदरम्यानचा अनुभव किरण माने यांनी शेअर करत म्हटलं आहे की, “आयुष्यात पहिल्यांदाच माझ्या अनोख्या चाहत्यांनी दसर्याच्या आदल्या दिवशीच माझा दिवस सोन्याचा केला ! काल अचानक काही तृतीयपंथी लोक अत्यंत प्रेमानं, आवर्जुन, खास माझा पत्ता शोधत मला भेटायला आले.”
“मला पाहून भारावून बोलू लागले, ‘किरणजी,तुमच्या भूमिका आमच्या काळजात कोरल्यात आम्ही. विलास पाटील आणि सिंधुताईंचे वडील पाहिल्यानंतर कायम वाटायचं असा बाप आम्हाला लाभायला पाहिजे होता. मलाही चिंधीसारखीच शिकायची आवड होती. बिगबॉसमध्ये असताना तुम्हाला खूप व्होटिंग केलं आम्ही’, ऐकताना माझे डोळे पाणावत होते. खास माझ्यासाठी खंडोबाच्या गाण्यावर त्यांनी डान्स केला. ‘आम्ही वरचेवर तुम्हाला भेटायला येऊ. प्रत्येक वेळी यशाची पायरी वर चढलेली दिसणार आहे आम्हाला. तुम्ही खूप खूप मोठे व्हाल. सुपरस्टार व्हाल. जगात नांव होईल. आमचे आशीर्वाद तुमच्या पाठीशी आहेत.’ असं म्हणून लाखमोलाचा आशिर्वाद देऊन गेले.”
“बाकी काहीही असो भावांनो, ही अशी माया खूप कमीजणांना लाभते. फॅन्सच्या ‘लाईव्ह’ प्रेमाबाबतीत मी खूप म्हणजे खूप भाग्यवान आहे ! कलाकार आहे मी. जसे चाहते आहेत, तसे काही निंदक, ट्रोलही आहेत. पण माझा द्वेष करणार्यांचा मला जरासुद्धा राग येत नाही. कारण त्यांच्यामुळंच तर माझ्या चाहत्यांच्या अफाट प्रेमाची किंमत किती मोलाची आहे, हे मला कळतंय. बहुत छोटे हैं मुझ से मेरे दुश्मन.. जो मेरे चाहनेवाले हैं, मुझ से बड़ॆ है ! लब्यू – किरण माने.” अशी आशयघन व भावुक करणारी पोस्ट किरण माने यांनी शेअर केली आहे. त्यांच्या या पोस्टवर अनेकांनी कमेंट करत त्यांचं कौतुक केलेलं पाहायला मिळतंय.
