Celebrity deaths in 2023 : २०२३ या वर्षात मराठीसह हिंदी सिनेसृष्टीला बऱ्याच धक्क्यांमधून जावं लागलं. कोणाला चित्रपट फ्लॉप गेल्याने तर कोणाला वैयक्तिक आयुष्यात आलेल्या अडचणींमुळे तर काहींच्या निधनाच्या बातमीमुळे हे वर्ष तितकं चांगलं गेलं नाही. यंदाच्या वर्षात अनेक हरहुन्नरी कलाकारांनी आपला जीव गमावला मात्र त्याची जागा कोणीच घेऊ शकत नाही. या कलाकारांची मेहनत, त्यांचा अभिनय प्रेक्षकवर्ग कधीही विसरु शकणार नाही. २०२३ या वर्षी जगाचा निरोप घेतलेल्या अशा या कलाकारांबद्दल जाणून घेऊया.
भालचंद्र कुलकर्णी
ज्येष्ठ अभिनेते भालचंद्र कुलकर्णी यांचे वयाच्या ८८व्या वर्षी आज १८ मार्च रोजी सकाळी कोल्हापुर येथे निधन झाले. त्यांनी वयाच्या ८८ व्या वर्षी अखेरचा श्वास घेतला. भालचंद्र यांनी ३०० च्यावर चित्रपटात आपल्या अभिनयाचा ठसा उमठवला होता. मराठी चित्रपट सृष्टीत सहाय्यक भूमिकेने भालचंद्र कुलकर्णी यांनी छाप सोडली होती. ‘नवरा नको गं बाई’, ‘पिंजरा’, ‘मुंबईचा जावई’, ‘सोंगाड्या’, ‘थरथराट’, ‘खतरनाक’ अशा अनेक चित्रपटातून भालचंद्र कुलकर्णी यांनी दमदार भूमिका साकारल्या. भालचंद्र कुलकर्णी यांचं मराठी सिनेसृष्टीतील योगदान फार मोठं आहे.
मिलिंद सफई
मराठी मनोरंजनसृष्टीतील अभिनेते मिलिंद सफई यांचं २५ ऑगस्ट २०२३ रोजी निधन झालं आहे. मिलिंद यांचं कर्करोगाच्या आजारामुळे निधन झालं आहे. मिलिंद सफई हे छोट्या पडद्यावरील लोकप्रिय अभिनेते होते. मालिकांसह अनेक सिनेमांमध्येही त्यांनी काम केलं आहे. ‘आई कुठे काय करते’ या छोट्या पडद्यावरील लोकप्रिय मालिकेत ते महत्त्वपूर्ण भूमिकेत होते. ‘प्रेमाची गोष्ट’, ‘लकडाऊन’, ‘पोस्टर बॉईज’, ‘मेकअप’ अशा अनेक मराठी सिनेमांत त्यांनी महत्त्वपूर्ण भूमिका साकारली.
ज्युनियर मेहमूद
अभिनेता नईम सय्यद ऊर्फ ज्युनियर मेहमूद यांचे ८ डिसेंबर रोजी निधन झाले आहे. ज्युनियर महमूद यांनी मुंबईतील खार येथील राहत्या घरात वयाच्या ६७व्या वर्षी अखेरचा श्वास घेतला. ज्युनियर महमूद यांच्या निधनानं मनोरंजनसृष्टीवर शोककळा पसरली. ज्युनिअर मेहमूद यांनी ‘संघर्ष’, ‘ब्रह्मचारी’, ‘दो रास्ते’, ‘कटी पतंग’, ‘हाथी मेरे साथी’, ‘हंगामा’, ‘छोटी बहू’, ‘दादागिरी’सह अनेक चित्रपटांमधून त्यांच्या अभिनयाची जादू दाखविली. मेहमूद यांनी अभिनेते राजेश खन्ना, गोविंदा यांच्या चित्रपटांमध्ये जास्त काम केले.
दिनेश फडणीस
सीआयडी फेम अभिनेते दिनेश फडणीस यांचे ५ डिसेंबर रोजी निधन झाले. वयाच्या ६३ व्या वर्षी त्यांनी अखेरचा श्वास घेतला. सीआयडी’ या लोकप्रिय मालिकेत ते इन्स्पेक्टर फ्रेडरिक्स हे पात्र साकारत होते. लिव्हर डॅमेज असल्याने त्यांच्या निधनाची बातमी समोर आली.
सीमा देव
मराठी, हिंदी सिनेसृष्टीतील सोज्ज्वळ अभिनेत्री अशी ओळख असलेल्या अभिनेत्री सीमा देव यांचं २४ ऑगस्ट रोजी सकाळी दीर्घ आजाराने निधन झालं. वयाच्या ८१ व्या वर्षी त्यांनी अखेरचा श्वास घेतला. सीमा देव यांचा मुलगा अभिनय देव यांच्या घरीच सीमा देव यांचं निधन झालं. दिवंगत अभिनेते रमेश देव यांच्या त्या पत्नी होत्या.
रवींद्र महाजनी
‘मुंबईचा फौजदार’, ‘देवता’, ‘जिवा सखा’, ‘पानिपत’ अशा अनेक दर्जेदार मराठी व हिंदी सिनेमांमधून प्रेक्षकांचे मनोरंजन करणारे अभिनेते रवींद्र महाजनी यांचे १४ जुलै रोजी आकस्मित निधन झाले. वयाच्या ७७व्या वर्षी त्यांनी जगाचा निरोप घेतला. ते पुण्यात राहत होते. रविंद्र महाजनी यांच्या आकस्मित निधनाने मराठी मनोरंजनसृष्टी शोकसागरात बुडाली.