Rakhi Sawant and Raqesh Bapat bonding : ‘बिग बॉस मराठी’ सीझन ६ हे पर्व विशेष गाजताना दिसत आहे. आता या पर्वाचा फिनाले वीक सुरु आहे. यंदाच्या या सीझनचा विजेता कोण होणार याकडे साऱ्यांच्या नजरा लागून राहिल्या आहेत. अशातच फिनाले वीकमध्ये जाण्याआधीच राखी सावंतच्या एक्झिटने अनेकांना नाराज केले. ‘बिग बॉस’च्या घरात असताना राखी आणि राकेश बापटचे अनोखे बॉण्डिंग पाहायला मिळाले. राखी राकेशच्या प्रेमात पडली याबाबत तिने टेलिव्हिजनवर खुलेआम सांगितले. याने अनेकांच्या नजरा त्यांच्या नात्याकडे लागून होत्या. मात्र, राकेशने राखीच्या प्रेमाचा स्वीकार केला नाही. आणि म्हणूनच राखीच राकेशवर एकतर्फी प्रेम आहे. ‘बिग बॉस’च्या घरात राखी राकेशच्या जवळ दिसली. वेळोवेळी ती राकेशच्या मागेपुढे करताना दिसली. इतकंच नाहीतर ती राकेशची बरेचदा काळजी घेतानाही दिसली. अशीही राखी नुकत्याच दिलेल्या मुलाखतीत राकेश बापट बरोबरच्या नात्याबाबत स्पष्टच बोलली.
राखीने नुकतीच ‘इट्स मज्जा’च्या Behind The fame या Podcast ला हजेरी लावली. यावेळी तिने राकेशबरोबरच्या नात्याबाबत स्पष्टपणे म्हटलं, “मला प्रेम करायचं आहे. खरंच मला असं वाटतं की, मला प्रेम हवंय, नवरा हवाय. मी घरात एकटीच राहते. एकटी झोपते, ऐकतो बाहेर जाते. कोणाचा तरी फोन मला यायला हवा. मला माझ्या नवऱ्याचा फोन यायला हवा जेवलीस का?, अगं कधी घरी येणार?, वाट बघतोय. मलापण माझ्या नवऱ्याला रोज टिफिन द्यायचा आहे. तो ऑफिसला जाणार त्याला टिफिन द्यायचा आहे. त्याची काळजी घ्यायची आहे. मला माझा संसार हवा आहे. पण असे नवरे नको जे त्यांच्या बायका-मुलांना सोडून माझ्याजवळ येणार. असे नवरे मला नको आहेत. म्हणून मी बापटला पसंत केला. की त्याचा आधीच घटस्फोट झाला आहे. तरुण मुलगा तर मला बिलकुल नको आहे. मला असा मुलगा हवा ज्याचं लग्न मोडलेलं आहे. आणि पहिल्यांदा तो खड्ड्यात पडून आलेला आहे. पण राकेश हा mummas boy आहे. तो फक्त आई आणि बहिणीचंच ऐकणार. माझं नाही ऐकणार. मी जीव जरी दिला त्याच्यासाठी तरी तो नाही ऐकणार. त्याची मम्मी आणि बहीण मला स्वीकारणार नाहीत”.
पुढे ती म्हणाली, “ते लोक ब्राह्मण कुटुंबातून आहेत. त्याच्यासाठी तर मी नॉनव्हेजपण सोडायला तयार आहे. पण राकेश तर नॉनव्हेज खातो. त्याने मला सांगितलं तो बॉलिवूड सोडणार. आईची शपथ मी सांगते मी सगळं सोडणार त्यांच्यासाठी. बॉलिवूडपण सोडणार. फक्त तू हो तर म्हण. कधी मी ‘बिग बॉस’समोर नाही जाणार. कधी मीडियाच्या समोर जाणार नाही. मी भरपूर केलंय. पण आता मला माझा संसार हवा आहे. नकोय काही मला. माझं एकावरच मनं जडलंय. आवडतोस तू. तू जेंटलमॅन आहेस. तू चांगला माणूस आहेस. आई-बाबा येतात आणि देवाघरी जातात. मला तुझी काळजी घ्यायची आहे. ठीक आहे. तुझी रिद्धी ही बायको आहे. पण तीसुद्धा एकदा दुसऱ्यासोबत लग्न करणारच आहे. तू काय एकटा राहणार आहेस का?, माझं पण तर वय झालंच आहे यार. मी पण एकटी, तू पण एकटा. त्याचं कोणीतरी आहे, म्हणजे असेल म्हणून त्याने मला नाही सांगितलं. अशी भरपूर लोक या जगात आहेत, जे एकतर्फी प्रेम करतात. सफल होत नाहीत. पण मी प्रयत्न करत राहणार आहे. मी आतमध्ये भरपूर प्रयत्न केले. कधी कधी मला असं वाटतं की मला वेड लागलं आहे”.
