संपूर्ण देशभरात तंत्रज्ञानाचा गैरवापर करत डीपफेक व्हिडिओ बनवणे तसेच फोटोबरोबर छेडछाड करणे हा चिंतेचा व चर्चेचा मुद्दा बनला आहे. काही दिवसांपूर्वी बॉलिवूड अभिनेत्री रश्मिका मंदाना, कतरिना कैफ, काजोल देवगण यांच्या अनेक फोटो-व्हिडीओची छेडछाड करण्यात आली होती. या तंत्रज्ञानाच्या गैरवापराबद्दल अनेक कलाकारांनी सोशल मीडियाद्वारे त्यांची मतदेखील व्यक्त केली आहेत.
अशातच आता सचिन तेंडुलकरची लेक सारा तेंडुलकरमुळे हा विषय पुन्हा एकदा चर्चेत आला आहे. याचं कारण काही दिवसांपूर्वी साराचा शुभमन गिलबरोबरचा एक फेक फोटो सोशल मीडियावर व्हायरल झाला होता. दरम्यान या सगळ्यावर तिने आता भाष्य केलं आहे. साराने तिच्या इन्स्टाग्राम स्टोरीवर एक पोस्ट शेअर केली आहे. ज्यात तिने तंत्रज्ञानाचा गैरवापर आणि तो वापर करणाऱ्या लोकांवर कारवाईची मागणी करत ही पोस्ट शेअर केली आहे.
साराने शेअर केलेल्या या स्टोरीमध्ये तिने असं म्हटलं आहे की, “सोशल मीडिया हा आपल्या सगळ्यांचा आनंद, दुःख व दैनंदिन घडामोडी व्यक्त करण्यासाठी एक चांगलं माध्यम आहे. पण तंत्रज्ञानाच्या चुकीच्या वापराने सत्य व खरेपणा एकमेकांपासून दूर जात आहे, आणि हे काळजी करण्याचे कारण आहे. माझ्या व्हायरल झालेल्या डीपफेक फोटोंबाबत मला कळलं, माझ्या नावाने एक्स (ट्विटर)वर एक फेक अकाऊंट आहे. लोकांची दिशाभूल करण्यासाठी ते चुकीच्या पद्धतीने पोस्ट तयार करतात. माझं स्वत:चं एक्स (ट्विटर)वर कोणतंही अधिकृत अकाऊंट नाही” असंही तिने म्हटलं आहे. यापुढे तिने ट्विटरने अशा फेक अकाऊंटविरुद्ध कारवाई करण्याची अपेक्षा व्यक्त केली आहे. त्याचबरोबर “मनोरंजनासाठी सत्याला किंमत मोजावी लागू नये. विश्वास व खरेपणाच्या संवादाला प्रोत्साहन देऊया,” असंही साराने या पोस्टमध्ये म्हटलं आहे.
दरम्यान काही दिवसांपूर्वी शुभमन गिलबरोबर साराचा व्हायरल झालेला फोटो हा डीपफेक होता. साराने तिच्या सोशल मीडियावर शेअर केलेल्या अर्जुनबरोबरच्या फोटोला चुकीच्या पद्धतीने एडिट केले होते. या फोटोत अर्जुनच्या चेहऱ्यावर शुभमनचा फोटो एडिट करुन लावण्यात आला होता आणि त्यामुळे सारा व शुभमन यांच्याबद्दल सोशल मीडियावर अनेक चर्चा रंगल्या होत्या.
