सिनेसृष्टीतील बरीच कलाकार मंडळी अशी आहेत जी त्यांच्या कामाच्या व्यस्त श्येड्युलमधून वेळात वेळ काढत कुटुंबासह, त्यांच्या मुलांसह वेळ घालवत असतात. कामानिमित्त म्हणा वा शुटिंगमुळे या कलाकारांना त्यांच्या कुटुंबियांना वेळ देणं बरेचदा शक्य होत नाही. यादरम्यान ही मंडळी कित्येकदा घरापासून दूर असतात. मात्र जेव्हा ही कलाकार मंडळी कामातून फ्री असतात तेव्हा ते त्यांच्या घरच्यांना वेळ देताना दिसतात. सोशल मीडियावरुन कुटुंबियांसह क्वालिटी टाइम शेअर करतानाचे अनेक फोटो, व्हिडीओ ही चाहते मंडळी त्यांच्या सोशल मीडियावरुन शेअर करतात. (Bhau Kadam Family Time)
अशातच सुप्रसिद्ध अभिनेता भाऊ कदमही कुटुंबाबरोबर स्पेशल टाइम घालवताना दिसत आहे. भाऊ ‘चला हवा येऊ द्या’ या कार्यक्रमातून गेली दहा वर्षे प्रेक्षकांचं मनोरंजन करत आहे. ‘चला हवा येऊ द्या’ या कार्यक्रमामुळे भाऊला खऱ्या अर्थाने लोकप्रियता मिळाली. या कार्यक्रमाशिवाय भाऊ बऱ्याच चित्रपटांमध्येही दिसला. गेली दहा वर्ष भाऊने या कार्यक्रमातून प्रेक्षकांचं मनोरंजन केलं आहे. मात्र या कार्यक्रमाने प्रेक्षकांचा निरोप घेतला आहे.
‘चला हवा येऊ द्या’ या कार्यक्रमाचा शेवटचा भाग नुकताच शूट झाला. या कार्यक्रमाच्या शुटिंगमधून मोकळं होताच भाऊ त्यांच्या कुटुंबाला वेळ देताना दिसला. भाऊने त्याच्या इंस्टाग्राम अकाऊंटवरून कुटुंबाबरोबर वेळ घालवतानाचे काही खास फोटो शेअर केले आहेत. भाऊ सहकुटुंब फिरायला गेला असल्याचं त्याच्या फोटोवरून कळतंय. भाऊ कुटुंबाबरोबर नागपूर दौरा करताना दिसत आहे. विमानप्रवासादरम्यानचे अनेक फोटो त्यांनी शेअर केले आहेत.
सोशल मीडियावर भाऊ बऱ्यापैकी सक्रिय असतो. बरेचदा तो त्याच्या कुटुंबाबरोबरचे अनेक फोटो, व्हिडीओ पोस्ट करतानाही दिसतो. भाऊ आणि त्याच्या मुलांचंही बॉण्डिंग खास आहे. त्यांनी शेअर केलेल्या पोस्टवरून याचा अंदाज येतो. जगभरात भाऊचा खूप मोठा चाहतावर्ग आहे. आजवर भाऊने त्याच्या अभिनय कौशल्याने रसिक प्रेक्षकांच्या मनात घर केलं आहे. आता ‘चला हवा येऊ द्या’ नंतर भाऊ प्रेक्षकांचं कोणत्या माध्यमातून मनोरंजन करणार याकडे साऱ्यांच्या नजरा वळल्या आहेत.
