‘बिग बॉस १७’चं पर्व संपलं असून सुप्रसिद्ध कॉमेडियन मुनव्वर फारुकीने यंदाच्या ट्रॉफीचा मान पटकावला. तर उपविजेता अभिषेक कुमार ठरला. तिसऱ्या क्रमांकावर अभिनेत्री मन्नारा चोप्रा आली. दरम्यान ‘बिग बॉस’च्या घरातून बाहेर पडल्यानंतर मन्नारा चर्चेत आली आहे. मन्नारा ‘बिग बॉस’मध्ये असताना तिची चुलत बहीण प्रियांका चोप्राने तिला सपोर्ट केलं होता. प्रियांकाने मन्नारासाठी पोस्टही शेअर केली होती. मात्र चुलत बहीण परिणीती चोप्राने मन्नाराच्या समर्थनार्थ कोणत्याही प्रकारची पोस्ट केलेली पाहायला मिळाली नाही. यावर आता मन्नारा चोप्राने प्रतिक्रिया दिली आहे. (Mannara Chopra On Parineeti Chopra)
‘टेली मसाला’ या एंटरटेनमेंट चॅनलशी बोलताना मन्नारा परिणीतीबाबत बोलली. तिला विचारलं गेलं की, तुला परिणीतीने कोणताही पाठिंबा दिला नाही. तर तुमचे काही जुने वाद आहेत का? यावर मन्नारा म्हणाली, “माझे कोणाशीही जुने वाद नाहीत. मी माझ्या कुटुंबावर खूप प्रेम करते. परिणीतीचा मला कालच भलामोठा मेसेज आला होता. तिने माझं कौतुक आणि अभिनंदन केलं. नुकतीच तिने एका नव्या प्रवासाला सुरुवात केली आहे, त्यासाठी माझ्याकडून तिला खूप साऱ्या शुभेच्छा.”
परिणीती चोप्राने अलीकडेच म्युझिक इंडस्ट्रीत तिच्या करिअरला सुरुवात केली आहे. आता ती लाइव्ह परफॉर्मन्सही करते. याबाबतची माहिती परिणीतीने सोशल मीडियावर दिली होती. मन्नाराबद्दल बोलायचे झाले तर, ती बॉलिवूड चित्रपट ‘झिद’मध्ये दिसली होती. मात्र, बॉलीवूडमध्ये मन्नाराला तितकेसे यश आले नाही. त्यानंतर तिने साऊथ इंडस्ट्रीत प्रवेश केला. मात्र ‘बिग बॉस १७’ मधूनच तिला लोकप्रियता मिळाली. ‘बिग बॉस’ सुरु झाल्यापासुन चाहत्यांनी या शोमध्ये मन्नाराला पसंती दिली.
मन्नारा चोप्राने या शोमध्ये खूप चांगली कामगिरी केलेली पाहायला मिळाली. अंकिता लोखंडेलाही तिने मागे सोडले. अंकिताला मागे टाकून मन्नारा टॉप ३ चा भाग बनली. शोमधून बाहेर पडल्यानंतर मन्नाराने कुटुंबासह वेळ घालवताना दिसली. प्रियांका चोप्राची आई मधु चोप्रानेही तिला तिच्या ‘बिग बॉस’च्या प्रवासात साथ दिली.