‘आई बाबा आणि साई बाबांची शपथ घालत प्राजुसह अवघ्या महाराष्ट्राला आपल्या प्रेमात भाग पडायला लावणारा दगडू लवकरच विवाहबंधनात अडकणार आहे. दगडू फेम अभिनेता प्रथमेश परबला त्याच्या खऱ्या आयुष्यातील प्राजु म्हणजेच त्याची जोडीदार मिळाली आहे. प्रथमेशच्या होणाऱ्या बायकोचं नाव क्षितिजा घोसाळकर असं असून गेले काही दिवस त्यांच्या केळवणाचे कार्यक्रम पार पडत आहेत. अभिनेत्याने स्वतः केळवणाचे फोटो शेअर करून ‘प्रतिजा’ ठरलं हा! बाकी तारीख लवकरच कळवतो, असं सांगितलं होतं. अशातच आता प्रथमेशने त्याच्या लग्नाची तारीख सांगितली आहे.
प्रथमेश-क्षितिजाने नुकतीच सोशल मीडियावर खास पोस्ट शेअर करत चाहत्यांना ही आनंदाची बातमी दिली आहे. प्रथमेश-क्षितिजा यांनी शेअर केलेल्या पोस्टवर दोघांचं कॅलिग्राफी डुडल असलेले फोटो पाहायला मिळत आहेत. तसेच या फोटोखाली प्रथमेश आणि क्षितिजा अशी त्यांची नावेदेखील आहेत. त्याचबरोबर दोघांच्या नावाखाली २४-०२-२४ ही तारीख लिहिली आहे. अर्थातच ही तारीख त्यांच्या लग्नाची तारीख आहे. या पोस्टखाली दोघांनी २४-०२ व ०२-२०२४ या तारखांची बेरीज करत दोन्ही तारखांपुढे इंग्रजी लिपीमध्ये ८ असे उत्तर लिहिले आहे आणि ८ या उत्तरापुढे त्यांनी Infinity असं लिहिलं आहे.
आणखी वाचा – मैत्रिणींबरोबर पाठक बाईंची सिक्कीम ट्रीप, बर्फामध्ये धमाल मस्ती करतेय अभिनेत्री, फोटो सोशल मीडियावर व्हायरल
तसेच यापुढे क्षितिजाने प्रथमेशला असं म्हटलं आहे की, “Infinity म्हणजे अमर्याद, अगणित, अनंत, कायम… आणि तेच तू माझ्यासाठी आहेस”. त्यामुळे आता त्यांच्या लग्नाला अवघे काही दिवसच उरले असल्याचे दिसत आहे. दरम्यान, प्रथमेश-क्षितिजा यांची ही आगळीवेगळी पोस्ट चाहत्यांसह नेटकऱ्यांचे चांगलेच लक्ष वेधून घेत आहे.
दरम्यान, प्रथमेश परबने मागच्या वर्षी व्हॅलेंटाईन डेला आपल्या प्रेमाची कबुली दिली होती. त्यानंतर यंदाच्या व्हॅलेंटाईन डेला तो क्षितिजा घोसाळकरशी साखरपुडा करणार आहे आणि त्यानंतर लगेच १० दिवसांनी दोघांचं लग्न होणार आहे. त्यांच्या या लग्नासाठी चाहते मंडळीदेखील चांगलेच उत्सुक आहेत.
