Tejaswini Pandit Post : सिनेसृष्टीत अनेक कलाकार आहेत ज्यांचा इतर कलाकारांसह मैत्रीपूर्ण बॉण्ड पाहायला मिळाला आहे. अशातच एका मराठमोळ्या अभिनेत्रीने शेअर केलेल्या मैत्रीपूर्ण पोस्टने साऱ्यांच्या नजरा वळविल्या आहेत. ही पोस्ट शेअर केली आहे अभिनेत्री तेजस्विनी पंडितने. तेजस्विनीने उमेश कामत, सिद्धार्थ जाधव या कलाकारांसह तसेच दिग्दर्शक संजय जाधव यांच्याबरोबरच्या मैत्रीची कहाणी या पोस्टमध्ये सांगितली आहे.येरे येरे पैसा’चा पहिला भाग २०१८ साली प्रदर्शित झाला होता. या पहिल्या भागाचे शूटिंग करताना त्यांच्यात झालेली मैत्री आजही अगदी तशीच आहे. ‘ येरे येरे पैसा ३’ हा चित्रपट १८ जुलै रोजी म्हणजे आज प्रदर्शित झाला आहे. या चित्रपटानिमित्त आणि संजय जाधवच्या वाढदिवसानिमित्त अभिनेत्रीने पोस्ट शेअर केली आहे.
तेजस्विनीने या पोस्टमध्ये असे लिहिले आहे की, “२०१७ ते आत्तापर्यंत. मी, UK, दादा आणि बंडोपंत (सिद्धार्थ), आम्ही चौघेही एका क्षेत्रात काम करत होतो. एकमेकांना ओळखत होतो, पण जवळून नक्कीच नाही. ‘येरे येरे पैसा’च्या निमित्ताने एकत्र आलो आणि कायमचे एकमेकांचे झालो. कारण काही जखमा दिसत नाहीत. जखमा होण्याच्यी कारणं वेगवेगळी असली तरी, प्रत्येकजण आयुष्यात कुठेतरी किंवा कुणाकडून तरी दुखावले गेलो होतोच. हाच आमच्यातील समानतेचा धागा होता. रोज मनातली घालमेल सुरु असताना आम्ही एक कॉमेडी चित्रपट करत होतो आणि म्हणूनच आमच्या चेहऱ्यावर काही काळ का असेना, परकाया प्रवेशातून का असेना किंवा त्या नवीन मित्रांना जाणून घेण्याच्या प्रक्रियेमुळे असो. हसू उमलत होतं. जुन्या गोष्टी, जुनी दुःखं मागे पडत होती. यातच आमच्या मैत्रीची वीण घट्ट बसत गेली”.
आणखी वाचा – स्टंटमॅन राजू यांच्या मृत्यूनंतर अक्षय कुमारचा मोठा निर्णय, वैद्यकिय सुरक्षा मिळवून देण्यासाठी धडपड
तिने पुढे असं लिहिलं की, “मग सेटवर होणाऱ्या वैयक्तिक चर्चा, दादरच्या बरिस्टामध्ये, ऑर्किड हॉटेलच्या मिडनाइट बफेच्यावेळी, हाजिअलीच्या सीताफळ क्रीमचा घास घेत, तर कधी बडेमियाँसमोर उभ्या केलेल्या गाडीच्या बोनेटवर होऊ लागल्या. भेटी वाढत गेल्या. आधी काम, मग टाइमपास पासून सुरु झालेला हा प्रवास आज चुकलो तर एकमेकांचे कान धरण्यापर्यंत कधी आला कळलंच नाही. किंबहुना आठ वर्षांनी आज मागे वळून पाहताना जाणवलं, फक्त वय वाढलंय आणि शरीर थोडं (shape/size) बदललं आहे. बाकी गेल्या ८ वर्षात चित्रपटाचं नावंही बदललं नाही (YYP3) आणि आमचं भक्कम नातंही. हा, आता जखमा तेवढ्या सुगंधी झाल्यात”.
अभिनेत्री म्हणाली की, “तर प्रेक्षकहो, आज पासून ‘येरे येरे पैसा ३’ हा आमच्या मैत्रीचा सिनेमा तुमच्या स्वाधीन करत आहोत. आमचा केंद्रबिंदू (संजय दादा) चा आज वाढदिवस आहे. त्याला आमच्या तिघांकडून प्रेम, शुभेच्छा आणि बरंच काही. अरे अभी तो पार्टी शुरु हुई है. तेवढं प्रेक्षक मित्र म्हणून तुम्ही पण पाठीवर शाबासकी द्यायला चित्रपटगृहात नक्की याल अशी आशा, अपेक्षा!”.
