Ahilyadevi Helps Paaru-Aditya : ‘झी मराठी’ वाहिनीवरील मालिका नेहमीच प्रेक्षकांचे भरभरून मनोरंजन करताना दिसतात. त्यातही ‘पारू’ या मालिकेने प्रेक्षकांचे विशेष लक्ष वेधून घेतले आहे. या मालिकेतील पारू आणि आदित्य या जोडीला प्रेक्षकांकडून प्रचंड प्रेम मिळताना दिसत आहे. सध्या या मालिकेत एक अतिशय महत्त्वाचं आणि भावनिक वळण आल्याचं पाहायला मिळत आहे. तर सध्या मालिकेत श्रीकांतच्या काही अटींमुळे पारू आणि आदित्य पुन्हा किर्लोस्कर घरात परतताना दिसतात. त्यामुळे आदित्य आणि पारूच्या आयुष्यातील प्रवासाला नव्याने सुरुवात होत असल्याचं पाहायला मिळत आहे.
दरम्यान, आता ही मालिका आणखी एका रंजक वळणावर येऊन पोहोचली आहे. ‘झी मराठी’ वाहिनीने नुकताच या मालिकेचा एक नवा प्रोमो शेअर केला आहे. या प्रोमोमध्ये पारूच्या टिफीन सर्व्हिस या छोट्याशा व्यवसायाला पुढे नेण्याचं तिचं स्वप्न दाखवण्यात आलं आहे. हे स्वप्न पूर्ण करण्यासाठी आदित्यला एक मोठा ऑर्डर पूर्ण करयचा असतो. मात्र ही ऑर्डर पूर्ण करण्यासाठी त्याला अहिल्यादेवीची मदत लागते. त्यामुळे आदित्य किर्लोस्कर घरात जाऊन अहिल्यादेवीसमोर मदतीचा हात मागतो. पण प्रोमोमध्ये पुढे दाखवण्यात आलं आहे की, अहिल्यादेवी आदित्यला मदत करण्यास स्पष्ट नकार देते. इतकंच नाही, तर दिशा देखील अहिल्यादेवीला आदित्यविरोधात चढवताना दिसते. त्यामुळे अहिल्यादेवी आणखी संतापते आणि आदित्यला मदत न करण्याचा ठाम निर्णय घेते.
यानंतर प्रोमोमध्ये एक भावनिक क्षण पाहायला मिळतो, जिथे आदित्य निराश आणि भावुक होतो. “आता ही ऑर्डर कॅन्सल करावी लागेल… पारूचं स्वप्न मी पूर्ण करू शकणार नाही” असं म्हणत तो भावुक होताना दिसतो. मात्र याच क्षणी कथेत नवा ट्विस्ट येताना पाहायला मिळतो. अहिल्यादेवी अचानक आदित्यसमोर येते आणि ऑर्डर कॅन्सल करण्याची काहीच गरज नसल्याचं सांगते. त्यामुळे आता पुढे अहिल्यादेवी खरंच आदित्यला मदत करणार का? अहिल्यादेवीच्या मदतीमुळे आदित्य पारूचं स्वप्न पूर्ण करू शकेल का? की अजून काही नवे ट्विस्ट प्रेक्षकांच्या भेटीला येणार आहेत? या सर्व ट्विस्टमुळे ‘पारू’ मालिकेने प्रेक्षकांचं लक्ष वेधून घेतलं असून पुढील भागांसाठी प्रेक्षकांमध्ये प्रचंड उत्सुकता निर्माण झाली आहे.
आणखी वाचा – सुप्रसिद्ध गायिका झाली आई, लग्नाच्या तीन वर्षांनी दिली गुडन्यूज, गोंडस मुलाला दिला जन्म
