मराठी सिनेसृष्टीतील एक लाडकं कपल म्हणजे अभिनेता अभिजित खांडकेकर आणि अभिनेत्री सुखदा खांडकेकर. या दोघांच्या लग्नाला दहा वर्ष पूर्ण झाली आहेत. अभिजीतने आजवर त्याच्या अभिनयाने तर सुखदाने तिच्या नृत्याने प्रेक्षकांच्या मनात घर केलं. ही जोडी साऱ्या प्रेक्षकांना विशेष आवडते. सोशल मीडियावरून नेहमीच ते काही ना काही पोस्ट शेअर करत चाहत्यांच्या संपर्कात राहत असतात. कामाच्या व्यस्त शेड्युलमधून ते एकमेकांना वेळ देताना दिसतात. अशातच दोघांनी नुकत्याच एका मुलाखतीत त्यांच्या लग्नाबद्दल आणि एकमेकांच्या सवयीबद्दल भाष्य केलं आहे. (Abhijeet Khandkekar And Sukhada Khandkekar)
अभिजितबरोबर लग्न करताना सुखदाच्या मनात नेमका कोणता विचार होता याबाबत द क्राफ्ट’ या युट्युब चॅनेलला दिलेल्या मुलाखतीत तिने भाष्य केलं आहे, याबाबत बोलताना सुखदा म्हणाली, “माझ्यासाठी लग्न म्हणजे काय? मला अभिसोबत कायमच असं जाणवलं की, एखाद्या बरोबर आपण असतो तेव्हा आयुष्य सोपं वाटतं. छोट्या गोष्टींमध्ये आनंद सापडतो. खूप मोठे माईल स्टोन्स पार करायला जाऊ नका. तर रोजच्या आयुष्यात आज मला सुट्टी आहे, तुला सुट्टी आहे, बसून एक छान फिल्म पाहूया. हे सोपं जे आहे ना ते मिस होतं अनेकदा. तुम्ही जेव्हा अनेकदा विचार करता माझ्या करिअरला सपोर्ट करणारा नवरा मला हवा आहे, अर्थात खूप महत्वाचा मुद्दा आहे. त्यावेळी करिअरला सपोर्ट करणारा म्हणजे नेमकं काय हे आधी समजून घ्या”
यापुढे स्वभावाबाबत बोलताना सुखदा म्हणाली, “मला सगळ्यात पहिली अभिच्या बाबतीत जाणवली ती सहजता. तुम्ही वाटेल त्या विषयावर एकमेकांशी बोलू शकता त्या विषयावर बोलू शकता एकमेकांशी. आज दहा वर्ष झाली लग्नाला तरी आजही मला वाटतं की, छोट्या छोट्या गोष्टींमध्ये आनंद जसा अभि शोधतो. ते मला जमलं पाहिजे. आणि अशा छोट्या छोट्या गोष्टींमध्ये आनंद शोधण्यात अभि माहीर आहे.””
लग्नाबाबत बोलताना सुखदा पुढे असं म्हणाली, “मी लग्नाला तयार झाले होते ते एका विचारावर की माझ्या जिवलग मित्राबरोबर मला आयुष्य घालवायला मिळेल. लग्नानंतर मग प्रेम, नवरा वगैरे येतं. पण माझ्या मित्राबरोबर आयुष्य घालवायचं मी ठरवलं होतं. आणि मी खूप आनंदी आहे.’ तेव्हा करिअरला सपोर्ट करणारा म्हणजे नक्की काय? हे कळायला हवं.”
