मालिका, चित्रपटांमध्ये दमदार भूमिकांमधून खणखणीत आवाजात एन्ट्री करणाऱ्या अभिनेत्री म्हणजे उषा नाडकर्णी. उषा यांनी आजवर साकारलेल्या प्रत्येक भूमिका प्रेक्षकांच्या मनात कायम घर करुन राहिल्या. आजही वयाच्या ७९व्य वर्षी त्या तितक्याच जोमाने व उत्साहाने काम करतात. कलेच्या जोरावर त्यांनी पैसा, प्रसिद्धी मिळवली. मात्र खासगी आयुष्यात कायमच त्या एकट्या राहिल्या. आई-वडिलांचं छत्र हरपल्यानंतर उषा हिंमतीने उभ्या राहिल्या. मुलगा मोठा झाला, त्याचं लग्न झालं त्यानंतर तोही दुरावला. त्याचा संसार त्याने थाटला. भावाचा आधार त्यांना होता. मात्र वर्षभरापूर्वी त्याचंही निधन झालं. आता उषा यांना एकटेपणा खात आहे. तीन वर्षांपूर्वी त्या जवळपास आठ दिवस आयसीयुमध्ये होत्या. याचबाबत त्यांनी आता भाष्य केलं आहे. (Usha nadkarni in hospital)
सुमन म्युझिक मराठीला दिलेल्या मुलाखतीत उषा म्हणाल्या, “पैसे कमवता कमवता माणसं कमावणं हे महत्त्वाचं. फक्त पैसाच असून चालत नाही. मी कधीच कोणावर ओझं झाले नाही. मध्यंतरी मी रुग्णालयामध्ये होते. या घटनेला दोन ते तीन वर्ष झाली. रात्रीचा मला दम लागायचा नाही. पण अवस्थ होऊन मी उठून बसायचे. मग मी तोंडात पंप मारायचे. झोपताना माझ्या बाजूला पंप असतोच. पण त्यानेही काहीच होत नव्हतं”.
“मग कधीतरी सकाळी सकाळी मला झोप लागायची. आंघोळ केली तर स्वतःचं अंगही पुसता यायचं नाही. खाली वाकता यायचं नाही. घरामध्ये मी फक्त खाली वाकूनच होते. भावाला मी फोन केला म्हटलं मला असं असं होत आहे. मग तो आला. भाऊ म्हणाला मालाडला तू शाह डॉक्टरांकडे ये. डॉक्टरांनी मला तपासलं आणि सांगितलं की, हिला आताच्या आता रुग्णालयात घेऊन जा. हृदयाचे ठोके हिचे बरोबर नाहीत असं डॉक्टर म्हणाले. त्यानंतर भावाने मला हिंदुजा रुग्णालयात नेलं”.
आणखी वाचा – लोकप्रिय मराठमोळ्या अभिनेत्रीचं थाटामाटात लग्न, शाही लूकची चर्चा, आदिनाथ कोठारेसह केलंय काम…
“तिथे जवळ जवळ मी आठ दिवस आयसीयुमध्ये होते. भाऊही माझा वयाने सत्तरीच्या पुढचा होता. मी त्या सगळ्यांना म्हणायचे की, तुम्ही सगळ्यांनी कुणीही येऊ नका. इथे आया-मावशी वगैरे सगळे चांगले आहेत. मला रुग्णालयामध्ये झोप यायची नाही. कारण जागा बदलली की, मला झोपच यायची नाही”. उषा तेव्हा रुग्णालयातून सुखरुप घरी आल्या. मात्र त्यांनी स्वतःची काळजी स्वतःच घेतली. कोणावरही अवलंबून न राहता आयुष्यभर जगायचं हे त्यांनी ठरवूनच ठेवलं आहे.
