प्रत्येकाच्या आयुष्यात आपला असा एक आवडता कलाकार असतो ज्याचा अभिनय पाहून त्यांना भेटायचं प्रत्येकाचं स्वप्न असतं. मराठी मालिका विश्वातील अशाच एका कलाकाराचं हे स्वप्न नुकतंच पूर्ण झालं आहे. ‘तुला शिकवीन चांगलाच धडा’ मालिकेतील अभिनेता हृषीकेश शेलार आणि जेष्ठ अभिनेते, महाराष्ट्र भूषण अशोक सराफ यांची एका कार्यक्रमा दरम्यान नुकतीच भेट झाली. हृषीकेश ने या कार्यक्रमातील अशोक सराफ यांच्या बरोबरचे काही फोटो शेअर करत भावूक कॅप्शन देखील दिलं आहे. (Hrishikesh Shelar Share Emotional Post For Ashok Saraf)
हृषीकेशने फोटो शेअर करत लिहिलं आहे “दहा वर्षांपूर्वी आपल्या जवळच्या एका शहरात आपल्या सगळ्यात लाडक्या नटाचं नाटक आलेलं असतं. आपण आपल्या जिगरी दोस्ताबरोबर आपल्या ‘त्या’ आवडत्या नटाचे डायलॉग म्हणत म्हणतच दीड-दोन तासाची रपेट मारुन नाटकाला पोहचतो. पडदा उघडतो, ‘ते’ स्टेज वर येतात, आपण त्यांना पहिल्यांदा प्रत्यक्ष पाहतो.. आणि पाहतच राहतो. हाच तो नट ज्याने आपलं बालपण सुंदर केलं,आनंदी केलं.. हाच तो नट जो आपल्याला इतका आपलासा वाटतो,जवळचा वाटतो, की तो आपल्या स्वप्नात येतो. आपण संभ्रमात.. हे सत्य आहे की तेच स्वप्न सुरु आहे?
आणखी वाचा- सर्वाधिक ऑस्कर पुरस्कार जिंकणारा ‘Openheimer’ चित्रपट OTT वर कुठे पाहता येणार? जाणून घ्या…
नाटक संपल्यावर त्यांच्याबरोबर फोटो काढण्यासाठी बॅक स्टेजला मोठी रांग असते. आपणही त्या गर्दीत सामील होतो, अर्धा तास रांगेत थांबून शेवटी आपल्या सुप्परस्टारच्या जवळ पोहोचल्यावर अचानक काहीतरी वाटतं आणि आपण फोटो न काढताच रांगेतून बाजूला होतो आणि दोस्ताला कानात म्हणतो मला ‘गर्दी’ म्हणून नाही भेटायचं यांना. मी भेटणार नक्की, पण आत्ता असं नाही. बॅक स्टेजला घुटमळत आमच्या भेटीचा तो क्षण आपण लांबणीवर टाकून देतो, अनिश्चित काळासाठी. आपण परत संभ्रमात.. हा शहाणपणा की मूर्खपणा?”.(Hrishikesh Shelar Share Emotional Post For Ashok Saraf)
“त्यानंतर बरोबर दहा वर्षांनी, आता स्टेजवर आपल्या ‘त्या’ सुप्परस्टारच्या हस्ते आपला सत्कार होतो, ते आपल्या कामाचं कौतुक करत असतात आणि त्यांचे शब्द स्लोमोमध्ये आपल्या कानावर हळुवार मोरपिसासारखे..! अगदी तसंच जसं आपण अनेकदा आपल्या स्वप्नात पाहिलंय. आपला आपल्या कानांवर-डोळ्यांवर विश्वास बसत नाही आपण थेट त्यांचे पाय धरतो, स्लोमो मध्येच. बॅकस्टेच्या रांगेतला मी, स्टेजवरच्या माझ्याकडे पाहून हसतो; आणि आपण परत एकदा कंटिन्युटी मध्ये संभ्रमात..हे सत्य आहे की तेच स्वप्न पुढे सुरु आहे?”(Hrishikesh Shelar Share Emotional Post For Ashok Saraf)
हृषीकेशने शेअर केलेल्या या फोटोंवर अनेक चाहत्यांनी कमेंट्स करत त्याचं कौतुक केलं आहे. हृषीकेशने यापूर्वी ‘सुंदरा मनामध्ये भरली’ य मालिकेत खलनायकी भूमिका साकारत प्रेक्षकांच्या मनात स्थान निर्माण केलं. तर सध्या ‘तुला शिकवीन चांगलाच धडा’ या मालिकेतून हृषीकेश घराघरात पोहचला आहे.
