बालपणी प्रत्येकजण काही ना काही खोड्या करत असतो. बालपण हे खोड्या करण्यासाठीच असतं. लहानपणी केलेल्या खोड्या आता आठवून प्रत्येक जण त्या आठवणीत रमतो आणि बालपणीच्या त्या आठवणी आठवून आता प्रत्येकालाच हसायला येते. प्रत्येक जण बालपणी अतरंगी असतो आणि असाच एक अभिनेता आहे ज्याने त्याच्या लहानपणी अनेक खोड्या केल्या आहेत, हा अभिनेता म्हणजे तुला शिकवीन चांगलाच धडा या मालिकेतील अधिपती म्हणजेच हृषीकेश शेलार.
झी मराठीवर लवकरच ड्रामा ज्युनिअर्स हा नवीन कार्यक्रम सुरु होणार आहे. यामध्ये लहान मुलांचा बहुरंगी अभिनय पाहता येणार आहे. याच कार्यक्रमाच्या निमित्ताने हृषीकेशने त्याच्या लहानपणीच्या काही खास किस्से सांगितले आहेत. याचा एक व्हिडीओ सध्या सोशल मीडियावर व्हायरल होत आहे. यावेळी त्याने त्याच्या स्वामी विवेकानंदाच्या फॅन्सी ड्रेसबद्दल व त्याने साकारलेल्या एका विदूषकाच्या पात्राबद्दलची खास आठवण सांगितली आहे.
या व्हिडीओमध्ये हृषीकेशने असं म्हटलं आहे की, “मी तिसरी-चौथीत असताना आमच्या इथे गणेशोत्सवादरम्यान फॅन्सी ड्रेस स्पर्धेत भाग घेतला होता आणि त्यात मी स्वामी विवेकानंद झालो होतो. यासाठी मी भगवी वस्त्रे परिधान केली होती आणि यामुळे माझ्या मित्रांनी माझे खूपच कौतुक केलं. त्यामुळे मी खूपच हवेत गेलो. पण या नादात मी माझं भाषण पाठ करायचो विसरलो होतो आणि मी मोठ्या आत्मविश्वासाने स्टेजवर गेलो आणि माझ्या लक्षात आलं की मला काहीच येत नाहीये आणि मी जीभ बाहेर काढली. तसाच एक फोटो माझ्याकडे आहे”.
आणखी वाचा – “तुम्ही अति करता असं वाटत नाही का?”, व्हिडीओवर कमेंट करणाऱ्याला क्रांती रेडकरचं उत्तर, म्हणाली…
यापुढे त्याने दूसरा किस्साही सांगितला. याबद्दल त्याने असं म्हटलं की “मी आताच २०१४ मध्ये एका नाटकात भाग घेतला होता. त्यात मी विदूषकाची भूमिका साकारली होतो. त्यात मी धोतर परिधान केलं होतं आणि मोठं खोटं पोटही लावलं होतं. तर मी स्टेजवर एंट्री केली आणि सगळेच माझ्यावर हसायला लागले. मला वाटलं माझ्या एंट्रीनेच सगळे खुश झाले आहेत, पण खरंतर माझ्या फटलेल्या धोतरामुळे मला सर्व हसत होते. कारण मी घातलेलं धोतर हे बांधलेलं नव्हतं तर शिवलेलं होतं आणि ते मधूनच फाटलेलं होतं. आणि याचा एक फोटोही माझ्याकडे आहे”
दरम्यान, हृषीकेशचा हा व्हिडीओ त्याच्या चाहत्यांना आवडला असून या व्हिडीओ ला त्याच्या अनेक चाहत्यांनी लाइक्स व कमेंट्स करत प्रतिसाद दिला आहे. तसेच अनेकांनी अभिनेत्याचे हे किस्से त्यांना आवडल्याचे कमेंट्सद्वारे म्हटलं आहे.