Bal Karve death : सर्वत्र गणेशोत्सवाचं आनंदाचं वातावरण असतानाच मराठी सिनेविश्वातून एक दुःखद बातमी समोर आली आहे. ज्येष्ठ अभिनेते बाळ कर्वे यांचं निधन झालं आहे. सकाळी १०.१५च्या सुमारास त्यांची प्राणज्योत मालवली याबाबत त्यांची कन्या स्वाती कर्वे यांनी माध्यमांना सोशल मीडियाद्वारे माहिती दिली. बाळ कर्वे यांना चिमणराव या मालिकेतील गुंड्याभाऊ या पात्रामुळे खऱ्या अर्थाने लोकप्रियता मिळाली. तीन दिवसांपूर्वीच बाळ कर्वे यांनी त्यांचा ९५ वा वाढदिवस साजरा केला होता. त्यांच्या जाण्याने संपूर्ण सिनेसृष्टीवर शोककळा पसरली आहे. तर अनेक कलाकार मंडळी त्यांना श्रद्धांजली वाहत आहेत.
अनेक दशके कलाक्षेत्रावर ठसा उमटविणाऱ्या बाळ यांनी मालिका, नाटक या क्षेत्रात महत्त्वपूर्ण कामगिरी केली. ‘सूर्याची पिल्ले’, ‘रथचक्र’, ‘तांदुळ निवडता निवडता’, ‘मनोमनी’, ‘कुसुम मनोहर लेले’ अशा नाटकांमध्ये बाळ कर्वे यांनी साकारलेल्या भूमिका गाजल्या. तर ‘प्रपंच’, ‘राधा ही बावरी’, ‘वहिनीसाहेब’, ‘उंच माझा झोका’ या मालिकांमध्ये त्यांनी काम केलं. ‘चिमणराव’ या मालिकेतील गुंड्याभाऊ या पात्रामुळे त्यांना खऱ्या अर्थाने लोकप्रियता मिळाली. ‘जैत रे जैत’ हा बाळ कर्वे यांचा पहिला चित्रपट. यानंतर त्यांनी ‘सुंदरा सातारकर’, ‘चांदोबा चांदोबा भागलास का’, ‘चटक चांदणी’, ‘बन्याबापू’ या चित्रपटात काम केले.
बाळ कर्वे यांचे खरे नाव ‘बाळकृष्ण’. पण पूर्ण नाव घेण्याऐवजी त्यांना सगळेच ‘बाळ’ अशी हाक मारू लागले. ‘कॉलेज ऑफ इंजिनीअिरग पुणे’ येथून ते स्थापत्य अभियंता झाले. मुंबई महानगरपालिकेत स्थापत्य अभियंता म्हणून त्यांनी बत्तीस वर्षे नोकरी केली.
