Isha Keskar Post Viral : ‘स्टार प्रवाह’ वाहिनी नेहमीच नवनवीन मालिका आणि वेगळ्या कथानकांच्या माध्यमातून प्रेक्षकांचं मनोरंजन करताना दिसते. काही मालिका या केवळ मनोरंजनापुरत्या मर्यादित न राहता थेट प्रेक्षकांच्या मनावर राज्य करतात. कथानकाशी जोडले गेलेले प्रेक्षक हळूहळू त्या मालिकेतील मुख्य पात्रांशी आणि कलाकारांशी भावनिक नातं जोडतात. त्यामुळेच एखाद्या मालिकेतील लोकप्रिय कलाकाराने अचानक मालिका सोडल्यास त्याचा थेट परिणाम प्रेक्षकांच्या भावना तसेच मालिकेच्या टीआरपीवर होताना दिसतो.
अशाच प्रकारची परिस्थिती ‘स्टार प्रवाह’वरील लोकप्रिय मालिका ‘लक्ष्मीच्या पाऊलांनी’ बाबत पाहायला मिळाली. या मालिकेने सुरुवातीपासूनच प्रेक्षकांची मनं जिंकली होती. मालिकेतील कला आणि अद्वैत या जोडीला प्रेक्षकांकडून भरभरुन प्रेम मिळालं होतं. या जोडीच्या केमिस्ट्रीने प्रेक्षकांचं भरभरुन मनोरंजन केलं. मात्र, दरम्यान कलाची भूमिका साकारणारी अभिनेत्री ईशा केसकर हिने काही वैयक्तिक कारणांमुळे मालिका सोडण्याचा निर्णय घेतला. ही बातमी समजताच अनेक प्रेक्षकांनी नाराजी व्यक्त केली होती. त्यानंतर निर्मात्यांकडून कलाच्या भूमिकेऐवजी नव्या अभिनेत्रीची एंट्री करण्यात आली. मात्र, प्रेक्षकांना हा बदल स्वीकारता आला नाही. परिणामी, याचा थेट परिणाम मालिकेच्या टीआरपीवर झाला.
आणखी वाचा – ‘आई कुठे काय करते’ फेम अभिनेत्री लवकरच अडकणार लग्नबंधनात, तारीख सांगत स्वतःच केला खुलासा, म्हणाली…
अखेर १२ डिसेंबर २०२५ रोजी ‘लक्ष्मीच्या पाऊलांनी’ या मालिकेचा शेवटचा भाग प्रेक्षकांच्या भेटीला आला आणि या लोकप्रिय मालिकेने अखेर प्रेक्षकांचा निरोप घेतला. यानंतर अभिनेत्री ईशा केसकर हिने सोशल मीडियावर एक भावनिक पोस्ट शेअर केली आहे. या पोस्टमध्ये तिने मालिकेच्या सुरुवातीपासून ते शेवटपर्यंतचे खास आणि आठवणींचे क्षण एका व्हिडीओच्या माध्यमातून शेअर केले आहेत. त्यासह कॅप्शनमध्ये तिने लिहीलं की, “कला… अचानक निरोप घेतल्याबद्दल मनापासून Sorry. तुम्ही प्रेक्षकांनी दिलेल्या प्रेमासाठी मी कायम ऋणी राहीन. Thank you so much for everything.” या शब्दांत तिने प्रेक्षकांसह मालिकेच्या संपूर्ण टीमचे मनापासून आभार मानले आहेत. दरम्यान, अभिनेत्री इशा केसकरला पुन्हा एका नव्या आणि दमदार भूमिकेत पाहण्यासाठी चाहते उत्सुकतेने वाट पाहताना दिसत आहेत.
