bollywood bodyguards salary : बॉलिवूड सेलिब्रिटी सुरक्षेशिवाय सार्वजनिक ठिकाणी बाहेर पडू शकत नाहीत, त्यामुळे त्यांचे अंगरक्षक (Bodyguard) नेहमीच त्यांचे संरक्षण करण्याची जबाबदारी घेतात. हे अंगरक्षक सेलिब्रिटींसोबत गर्दीच्या कार्यक्रमांमध्ये आणि समारंभांमध्ये जातात. सेलिब्रिटींच्या अंगरक्षकांच्या पगाराची चर्चा सोशल मीडियावरही मोठ्या प्रमाणावर होते. असे म्हटले जाते की, कलाकारांच्या संरक्षणासाठी या अंगरक्षकांना कोट्यवधी रुपये मिळतात. आता, शाहरुख खानचा माजी अंगरक्षक, यासीनने अंगरक्षकांच्या पगाराबद्दल उघडपणे भाष्य केले आहे. अर्थात या बॉडीगार्डच्या पगाराबाबत जाणून घ्यायला प्रेक्षक नेहमीच उत्सुक असतात.
‘हिंदी रश’शी बोलताना, यासीनने कोट्यवधी रुपयांचे दावे खोटे असल्याचे फेटाळून लावले. त्याने स्पष्ट केले की, अंगरक्षकांच्या पगाराबाबत सोशल मीडियावर पसरत असलेल्या बातम्या खोट्या आणि अतिरंजित आहेत. यासीन म्हणाला, “हे आकडे खूपच वाढवून सांगितले जात आहेत. प्रत्यक्षात, व्यवस्था वेगळ्या पद्धतीने काम करते. मला वाटते की सोशल मीडिया चुकीचा संदेश देत आहे. अंगरक्षकांना २ ते २.५ कोटी रुपये मिळत नाहीत. जर कोणी मोठ्या स्टारचा अंगरक्षक असेल, तर त्याचा पगार निश्चित असतो. शिवाय, जेव्हा एखादा चित्रपट बनवला जातो, तेव्हा एक वेगळा करार केला जातो. निर्मात्यानुसार, त्यांना त्या चित्रपटासाठी एक निश्चित रक्कम दिली जाते”.
तो पुढे म्हणाला, “माझ्या आठवणीप्रमाणे, पूर्वी चित्रपटसृष्टीत अंगरक्षकांना पगार मिळत नव्हता. फक्त ड्रायव्हर, मेकअपमन आणि स्पॉट बॉय यांनाच पैसे दिले जायचे. जेव्हा मी शाहरुख खानसोबत काम करायला सुरुवात केली, तेव्हा माझ्या लक्षात आले की आम्हीसुद्धा कामच करत होतो. आम्हाला पैसे मिळायचे, पण फक्त जगण्यापुरतेच.” यासीनने स्पष्ट केले की, त्याने हा मुद्दा इंडस्ट्रीत उपस्थित केला, ज्यामुळे महत्त्वपूर्ण बदल घडले. तो म्हणाला, “मला आठवतंय, मी एका निर्मात्याशी बोलून म्हणालो होतो की, जसे इतरांना करार (कॉन्ट्रॅक्ट) मिळतात, तसेच आम्हालाही पैसे दिले पाहिजेत.”
आणखी वाचा – “मला कोणताही पश्चात्ताप नाही”, लग्नाच्या तीन वर्षांतच संसार मोडला, सुप्रसिद्ध अभिनेत्री म्हणाली…
सेलिब्रिटींच्या अंगरक्षकांना दरमहा ८-१० लाख रुपये मिळतात, हे दावे यासीनने अखेर फेटाळून लावले. तो म्हणाला, “मला नाही वाटत की ते वर्षाला इतके कमावतात. जर कोणी स्वतःला सेलिब्रिटी समजून त्यांना पैसे देत असेल, तर ती वेगळी गोष्ट आहे, पण तो पगारसुद्धा नाही. ८-१० लाख रुपये कोण देतं?”.
