करोनाचं संकट संपूर्ण जगावर ओढावलं आणि हा काळ सगळ्यांसाठीच कठीण होता. कोणी आपल्या कुटुंबातील सगळ्यात जवळच्या व्यक्तीला गमावलं तर कोणाचं संपूर्ण कुटुंबच या आजाराने गिळून टाकलं. कित्येक लोकांच्या नोकऱ्या गेल्या तर काहींना आर्थिकदृष्ट्या हतबलता आली. सगळं काही विस्कटलेलं असताना करोना लस घेण्याचं आवाहन सरकारद्वारे करण्यात आलं. नागरिकांनी करोना लस घेतली. मात्र याचे काही परिणाम जाणवू लागले. करोना लस घेतल्यानंतर अनेकांना बरेच उद्भवले. असंच काहीसं सुप्रसिद्ध अभिनेत्री श्रृतिका अर्जुनबाबतही घडलं. नुकत्याच दिलेल्या एका मुलाखतीत तिने याबाबत भाष्य केलं. श्रृतिकाने मृत्यू अगदी जवळून पाहिला. (shrutika arjun heart attack)
पारस छाब्राच्या पॉडकास्टमध्ये श्रृतिकाने हजेरी लावली होती. यावेळी श्रृतिका म्हणाली, “५ ते ६ वर्षांपूर्वी मी ३० वर्षांची होती. अवघ्या ३०व्या वर्षी कोणाचीही मरण्याची इच्छा नसते. करोना काळात या आजारवर लस आली होती. इतरांप्रमाणे मीही करोना लस घेतली. माझी याआधी नॉर्मल डिलिव्हरी झाली होती. तेव्हा मला जेवढा त्रास झाला त्यापेक्षा अधिक त्रास मला लस घेतल्यानंतर झाला. मी खूप त्रास सहन केला. लस घेतली त्या रात्री अर्जुन (पती) माझ्या बरोबर होता”.
पुढे ती म्हणाली, “अर्जुन सतत मी जिवंत आहे की नाही, श्वास घेत आहे की नाही बघत होता. दुसऱ्या दिवशी मी सकाळी उठले. फक्त दोन पावलंच चालले आणि जमिनीवर पडले. माझा बीपी ४० वर होता. हे माझ्या शरीरासाठी खूपच घातक होतं. माझ्या आजूबाजूला सगळे रडत आहेत याची मला काहीच कल्पना नव्हती. सगळे मला उठवण्याचा प्रयत्न करत होते. मी माझ्या मनामध्येच ओम नमः शिवाय बोलत होते. काही वेळानंतर मी कशीतरी शुद्धीमध्ये आले”.
“मला शुद्ध नक्की कशी आली? तेच मला कळालं नाही. शुद्धीवर मी आले. पण त्यानंतर ४८ तासांमध्येच माझं संपूर्ण शरीर गळून पडलं. शरीरात त्राणच नाहीत असं झालं. अर्जुनने मला किंक काँगचा चित्रपट बघण्याचा सल्ला दिला. त्याने तो चित्रपट लावला. किंग काँगची जेव्हा चित्रपटात एन्ट्री होते आणि त्यामागून जेव्हा आवाज येतो तो ऐकूनच मला कसंतरी व्हायला लागलं. मी घाबरले. अर्जुनला काही सांगायच्या आतच माझा गाल वाकडा झाला. माझा डाव हातही वर होत नव्हता. झटक्यासारखाच एकंदरीत संपूर्ण प्रकार घडला. स्ट्रोक, पॅरालिसिस सारखंच मला झालं. आम्ही दोघंही खूप घाबरलो होतो”. श्रृतिकाने मृत्यू अगदी जवळून पाहिला.
