सुप्रसिद्ध अभिनेत्री शेफाली जरीवालाने अवघ्या ४२व्या वर्षी जगाचा निरोप घेतला. हृदयविकाराच्या झटक्यामुळे तिचं निधन झालं. शेफालीच्या अचानक जाण्यामुळे कुटुंबियांवर मोठा दुःखाचा डोंगर कोसळला आहे. तसेच पती पराग त्यागीची अवस्थाही न पाहण्यासारखीच आहे. शेफालीचं जाणं कलाविश्वालाही परवडलं नाही. तिच्या अंतिम संस्काराला कलाकारांनाही रडू कोसळलं. अशातच शेफालीचा पूर्वाश्रमीचा पती हरमीत सिंहनेही भावुक पोस्ट शेअर केली होती. आता नुकत्याच दिलेल्या एका मुलाखतीत हरमीतने शेफालीबरोबर झालेल्या शेवटच्या भेटीबाबत भाष्य केलं आहे. तसेच निधनापूर्वी शेफाली व हरमीत भेटले असल्याचंही त्याने सांगितलं आहे. (Shefali Jariwala ex husband share experience)
विकी लालवानीला दिलेल्या मुलाखतीत हरमीतने शेफालीबाबत भाष्य केलं. तसेच दोघांची भेट झाल्यानंतर नेमकं काय घडलं? याविषयीही सविस्तर सांगितलं. हरमीत म्हणाला, “मला अजूनही आठवतं की, दोन ते तीन वर्षांपूर्वी मी बांग्लादेशमध्ये एका शोसाठी गेलो होतो. या शोसाठी सनी लिओनी आणि शेफाली जरीवालाही आली होती. आम्ही तिघं एका प्रायव्हेट जेटमधून परतीचा प्रवास करत होतो”.
पुढे हरमीत म्हणाला, “प्रवास करतान आम्ही दोघं बाजू बाजूच्या सीटवर बसलो होतो. त्यादरम्यान आम्ही खूप बोललो. गप्पा मारल्या. त्याशिवाय काही पार्टी, कार्यक्रमांमध्येही आमची भेट झाली होती. तेव्हाही आमच्या बऱ्याच गप्पा रंगल्या होत्या. पुढील आयुष्यातील वाटचालीसाठी आम्ही एकमेकांना शुभेच्छाही दिल्या होत्या”. शेफालीबाबत बोलताना हरमीत त्यांच्या जुन्या आठवणींमध्ये रमला होता. कामानिमित्त भेटीगाठी झाल्या तर शेफाली व हरमीत एकमेकांशी संवाद साधत होते. खासगी आयुष्य कधीच त्यांनी त्यांच्या कामामध्ये आणलं नाही.
२००४ मध्ये शेफालीने हरमीतसह लग्न केलं होतं. मात्र अवघ्या पाच वर्षांमध्येच त्यांचा संसार मोडला. २००९मध्ये शेफाली-हरमीतचा घटस्फोट झाला. दरम्यान शेफालीने त्याच्यावर अनेक गंभीर आरोप केले होते. शारीरिक तसेच मानसिक छळ करत असल्याचं तिने म्हटलं होतं. त्यादरम्यान शेफाली व हरमीतचा वाद टॉक ऑफ द टाऊन ठरला होता. घटस्फोटानंतर काही वर्षांनी म्हणजेच २०१४मध्ये तिने पराग त्यागीसह संसार थाटला. मात्र लग्नाच्या ११ वर्षांमध्येच शेफालीने जगाचा निरोप घेतला.
