Sankarshan Karhade Shared Special Post : मराठमोळा अभिनेता संकर्षण कऱ्हाडे नेहमीच कोणत्या ना कोणत्या कारणामुळे चर्चेत असतो. आजवर संकर्षणने त्याच्या अभिनयाच्या जोरावर नाटक, मालिका यांमधून रसिक प्रेक्षकांची मन जिंकली. अभिनयाशिवाय कवी, लेखक या जबाबारदाऱ्याही संकर्षण उत्तमरीत्या सांभाळतो. सध्या संकर्षण रंगमंचावर धुमाकूळ घालत आहे. सोशल मीडियावरही संकर्षणचा बऱ्यापैकी वावर असलेला पाहायला मिळतो. नेहमीच तो सोशल मीडियावर काही ना काही शेअर करत चाहत्यांच्या संपर्कात राहतो. याद्वारे तो त्याचे अनेक वैयक्तिक अनुभव, कामादरम्यान आलेले अनुभव, नाटक दौऱ्याच्या आठवणी, कुटुंबाबाबतचे अनुभव शेअर करतो. अशाप्रकारे संकर्षण सोशल मीडियावर नेहमीच सक्रिय असतो.
अशातच संकर्षणने त्याच्या इंस्टाग्राम अकाउंटवर शेअर केलेल्या एका पोस्टने साऱ्यांच्या नजरा वळविल्या आहेत. संकर्षणने केलेली ही पोस्ट त्याच्या वडिलांसाठीची आहे. बाबांसाठी खास पोस्ट शेअर करत संकर्षणने असं म्हटलं आहे की, “आमचे बाबा परवा मुंबईहून तडकाफडकी परभणीला निघाले कारण काय तर शेतातल्या गड्याचा फोन आला की, आपल्या शेतातला बैल रामा गेले दोन दिवस झाले जागचा उठत नाहीये, काहीच खात नाही आहे. मी म्हणालो, बाबा गडी आहे मग तुम्ही जायची काय गरज?’. मला म्हणाले, ‘उद्या तुला बरं वाटलं नाही तर असाच परभणीहून पळत येईन ना’. मी म्हणालो, ‘मी काय बैलासारखाच का?’. बाबा म्हणाले, ‘नाही पण बैल पोरासारखा सांभाळावा’. निघाले ते निेघालेच”.
पुढे त्याने लिहिलं आहे की, “दोन दिवस त्याच्याबरोबर वेळ घालवला, त्याला खूप माया केली , त्याला स्वतःच्या हाताने खाऊ घातलं. देवाचा धावा करुन त्याला तीर्थ म्हणून पाणी पाजलं आणि आता रामा कामाला लागला. याला तुम्ही काय म्हणाल?, म्हणा काही पण, सगळ्या आघाड्यांवर सतत कसं १०० टक्के खरं उतरायचं हे बाप माणसांना बरोबर कळतं”. ही पोस्ट शेअर करत संकर्षणने त्याच्या बाबांचा शेतातील व्हिडीओ पोस्ट केला आहे. यांत ते रामा या बैलाची विशेष काळजी घेताना दिसत आहेत.
आणखी वाचा – ‘छबी’ चित्रपटाचा थरारक टीझर समोर, कथेला हॉरर टच, दमदार कलाकारांसह मराठीमध्ये नवा प्रयोग
हा व्हिडीओ व कॅप्शन पाहून अनेकांनी या व्हिडीओला पसंती दर्शविली आहे. अनेकांच्या मनाला हा व्हिडीओ भावला असल्याचं कमेंटमध्ये कळतंय. या व्हिडीओखाली अमृता खानविलकर, संग्राम समेळ, तेजश्री प्रधान, मुग्धा वैशंपायन या कलाकारांनीही कमेंट करत कौतुक केलं आहे.
