सगळीकडे गणेशोत्सवाला सुरुवात झाली आहे. गणपती बाप्पाचं धुमधडाक्यात आगमन झालं आहे. बाप्पा आपल्या स्थानावर विराजमान झाले आहेत. सगळीकडे बाप्पाच्या रंगात रंगून जात आहेत. सामान्यांसह मनोरंजनसृष्टीतील कलाकारांच्या घरातही बाप्पा विराजमान झाला आहे. अशातच एका अभिनेत्रीने या शुभदिनी एक नवी सुरुवात केली आहे. ती अभिनेत्री म्हणजे अनघा अतुल. अनघा नुकतीच रंग माझा वेगळा या मालिकेत दिसली होती. ती सोशल मीडियावर बरीच सक्रिय असते. विविध फोटो व व्हिडिओ ती सोशल मीडियावर शेअर करत असते. नुकतीच तिने शेअर केलेली पोस्ट सोशल मीडियावर बरीच व्हायरल होत आहे. (angha atul start new business)
‘स्टार प्रवाह’ वाहिनीवरील नुकत्याच निरोप घेतलेल्या ‘रंग माझा वेगळा’ या मालिकेत तिने श्र्वेता हे पात्र साकरलं होतं. तिने आपल्या अभिनयातून प्रेक्षकांची मनं जिंकली आहेत. नुकतेच तिने सोशल मीडियावर काही फोटो शेअर केले. त्यात ती तिच्या भावाबरोबर दिसत आहे. बांधकामाच्या ठिकाणी त्यांनी फोटो काढत त्याला कॅप्शन देत ती लिहीते, ‘वक्रतुण्ड महाकाय सूर्यकोटि समप्रभ | निर्विघ्नं कुरु मे देव सर्वकार्येषु सर्वदा | असं म्हणतात कुठल्याही कार्याची सुरुवात बाप्पाच्या नावाने करतात. त्यात बाप्पाच्या आगमनाचा दिवस असेल याहुन मंगल दिवस नाही. गेले काही दिवस एकच प्रश्न विचारला जातो आहे, “आता पुढे काय?” ‘
पुढे ती लिहिते, ‘यापुढे पुणेकरांच्या ह्रदयात थोडी जागा निर्माण करायचं ठरवलयं! मी आणि माझा भाऊ घेऊन येतो आहे. “वदनी कवळ” परिपूर्ण थाळीचा आस्वाद. शुद्ध, सात्विक आणि रुचकर जेवण. In the heart of Pune, Deccan. लवकरच येतयं तुमच्या भेटीला. खूप धाडस करून हे पाऊल उचलते आहे. अभिनेत्री म्हणून खूप प्रेम मिळालं आता उद्योजित म्हणून तुमच्या सहकार्याची, प्रेमाची आणि आशिर्वादाची गरज आहे. || गणपती बाप्पा मोरया ||’, असं लिहीत तिने एक नवीन सुरुवात करणार असल्याचं सांगितलं.
अनघाने आजपर्यंत विविध पात्र साकारत प्रेक्षकांच्या मनात जागा मिळवली. ‘रंग माझा वेगळा’ या मालिकेत महत्त्वपूर्ण भूमिका साकारली होती. तिने यापुर्वी ‘झी मराठी’वरील ‘दिल दोस्टी दोबारा’ या मालिकेत ती दिसली होती. अनघाने ‘अनन्या’ या नाटकात सहाय्यक अभिनेत्री म्हणून भूमिका साकारली होती. तिने अभिनय क्षेत्रात काम करण्याआधी बऱ्याच वेगवेगळ्या क्षेत्रात आपली वेगळी ओळख निर्माण केली आहे. आता ती पुन्हा नवी जबाबदारी घेऊन नव्या क्षेत्रात पदार्पण करत आहे.
