९ फेब्रुवारी रोजी रजनीकांत यांचा बहुचर्चित ‘लाल सलाम’ हा चित्रपट प्रदर्शित झाला. या चित्रपटाच्या माध्यमातून रजनीकांत यांची मुलगी ऐश्वर्या रजनीकांतने दिग्दर्शनात कमबॅक केलं. ऐश्वर्या रजनीकांत दिग्दर्शित ‘लाल सलाम’ चित्रपटगृहात अपेक्षित कामगिरी करू शकला नाही. या चित्रपटात रजनीकांत यांची भूमिका असूनही या चित्रपटाने ११ दिवसांत बॉक्स ऑफिसवर केवळ १६.३४ कोटी रुपयांची कमाई केली. चित्रपटाला मिळणारा कमी प्रतिसाद पाहता निर्मात्यांनी हा चित्रपट आता ओटीटीवर प्रदर्शित करण्याची तयारी सुरू केली आहे.
लाल सलाम हा चित्रपट स्पोर्ट्स ड्रामा असला तरी क्रिकेट स्पर्धेच्या निमित्ताने समाजात हिंदू-मुस्लीम यांच्यात धार्मिक तेढ निर्माण करण्याचा प्रयत्न कसा केला जातो हे या चित्रपटातून दिसून येते. या चित्रपटातून धार्मिक सलोख्याचे महत्त्व खेळातून दाखविण्याचा प्रयत्न केला आहे. या चित्रपटाला समीक्षकांकडून प्रशंसा मिळाली असली तरी बॉक्स ऑफिसवर तो प्रेक्षकांना प्रभावित करण्यात अपयशी ठरला.
आणखी वाचा – सुप्रसिद्ध अभिनेत्री संभावना शेठच्या आईचं निधन, पोस्ट शेअर करत दिली माहिती, म्हणाली, “खूप दुःख…”
या चित्रपटाची बॉक्स ऑफिसवरील कामगिरी पाहता याचे डिजिटल अधिकार कुणीच विकत घ्यायला तयार नव्हते. पण आता ‘नेटफ्लिक्स’ या ओटीटी प्लॅटफॉर्मने या चित्रपटाचे डिजिटल हक्क विकत घेतल्याचं सांगितलं जात आहे. तर ‘सन टीव्ही’ने सॅटेलाइट हक्क विकत घेतल्याचं स्पष्ट झालं आहे.
दरम्यान, पुढील महिन्यात मार्चमध्ये ‘लाल सलाम’ नेटफ्लिक्सवर प्रदर्शित होणार असल्याचे सांगण्यात येत आहे. ‘लाल सलाम’ पुढील आठवड्यापर्यंत चित्रपटगृहांमधून काढून टाकण्याची शक्यता आहे. अशातच मार्चच्या पहिल्या आठवड्यातच हा चित्रपट आता ओटीटीवर प्रदर्शित होण्याची शक्यता आहे.
