बाजारात जाऊन भाजी, फळं, विविध जीवनावश्यक वस्तू खरेदी करण्यात वेगळंच सुख असतं. ताजी भाजी दिसली की, खरेदी करण्याचा मोहही आवरत नाही. मात्र अलिकडच्या काळात चित्र काहीसं बदलेलं दिसतं. लोकांचं ऑनलाइन वस्तू खरेदी करण्याचं प्रमाण अधिक वाढलं आहे. झेप्टो, स्वीगी इन्स्टामार्ट, ब्लिंकइट सारख्या ऑनलाइन दुकानातून विविध खरेदी केली जाते. कामाअभावी न मिळणारा फारसा वेळ यामुळे आता ऑनलाइन मार्गाचा अवलंब केला जातो. मोबाईलवरुन या अ‍ॅपद्वारे एखादी भाजी, वस्तू ऑर्डर केली की, १० ते १५ मिनिटांच्या आत दारात हजर. पण आता ऑनलाइन खरेदीचा वापर वाढल्यानंतर याचे दुष्परिणामही दिसू लागले आहेत. याचाच अनुभव सुप्रसिद्ध मराठी अभिनेत्री प्रिया बापटला आला. (Priya bapat online shopping experience)
Zepto, blinkit द्वारे ऑनलाइन वस्तू खरेदी करण्याचं प्रमाण अधिकाधिक वाढलं आहे. स्वयंपाकघरात लागणारी एखादी गोष्ट ऑर्डर केली तर काही मिनिटांमध्ये ती हातात असते. पण याचे जितके फायदे आहेत तितकेच दिवसागणिक तोटेही समोर येत आहे. या अ‍ॅपद्वारे आता कित्येक जणांना खराब वस्तू डिलिव्हर होत असल्याची प्रकरणं समोर येत आहेत. सोशल मीडियाद्वारे ग्राहक फोटो पोस्ट करत तक्रार करतात. त्यामुळे आता ऑनलाइन खरेदी करणाऱ्या अ‍ॅपचा दर्जा घसरला आहे की काय? असा प्रश्न उद्भवला आहे.
प्रियालाही याचा चांगलाच अनुभव आला. झेप्टोवरुन सतत ती काही ना काही ऑर्डर करते. मात्र तिला याचा वाईट अनुभव आला. म्हणून प्रियाने blinkit वरुन भाजी मागवली. मात्र तिला किड लागलेली भाजी आली. ऑर्डर केलेला कोबी अगदी सडलेला होता. याचाच तिने फोटोही शेअर केला. या कोबीमध्ये अक्षरशः किडे झाले होते. हे पाहून ती हैराणच झाली.
प्रिया म्हणाली, “झेप्टोद्वारे डिलिव्हरी करण्यात येणाऱ्या घाणेरड्या दर्जाची फळं व भाजांचा मला कंटाळा आला होता. म्हणून मी blinkit वरुन ऑर्डर करायचं ठरवलं. पण याचा अनुभव आधीपेक्षाही अधिक वाईट होता. Blinkit वरील माझी ही पहिलीच ऑर्डर होती. त्यांनी मला पूर्णपणे सडलेला कोबी पाठवला. त्याला अगदी घाणेरडा वासही येत होता. मी जेव्हाही कधी खालच्या दर्जाच्या वस्तू डिलिव्हर केल्या गेल्या मी तक्रार केली. त्याचे पैसेही मला परत आले. पण ही फक्त पैसे परत करण्याची गोष्ट नाही. तुम्ही किती चांगल्या प्रकारच्या वस्तू डिलिव्हर करण्याचं वचन देता त्याचा हा प्रश्न आहे. ज्या गोष्टी लवकर खराब होतात त्या चांगल्या आहेत की नाहीत हे तपासूनच डिलिव्हर करणं गरजेचं आहे. अशाप्रकारच्या वस्तू स्वीकारल्या जाणार नाहीत. आणि त्याहीपेक्षा अधिक निराशा आहे”. प्रियाने पोस्टद्वारे संताप व्यक्त केला.
