नुकतीच हिंदू नववर्षाची सुरुवात झाली असून गुढीपाडवा हा सण मोठ्या जल्लोषात साजरा झाला. ठिकठिकाणी मोठ्या शोभायात्रा व विविध कार्यक्रमांचे आयोजन केल्याचे पाहायला मिळाले. मराठी मनोरंजन सृष्टीतील काही कलाकारांसाठी यंदाचा गुढीपाडवा खास होता. प्रथमेश परब व क्षितिजा घोसाळकर, प्रथमेश लघाटे व मुग्धा वैशंपायन, तितीक्षा तावडे व सिद्धार्थ बोडके, पूजा सावंत व सिद्धेश चव्हाण, पियुष रानडे व सुरुची अडारकर या कलाकारांसह अमृता देशमुख व प्रसाद जवादे या कलाकारांचा यंदाचा हा पहिलाच गुढीपाडवा होता.
आपल्या पहिल्या गुढीपाडव्यानिमित्त सर्वच कलाकारांनी सोशल मीडियावर खास पारंपरिक अंदाजातले फोटो शेअर करत चाहत्यांना शुभेच्छा दिल्या होत्या. त्याचप्रमाणे प्रसाद व अमृता यांनीही त्यांचे हटके फोटो शेअर करत गुढीपाडव्यानिमित्त शुभेच्छा दिल्या. अशातच त्यांनी या गुढीपाडवा स्पेशल फोटोशूटचे पडद्यामागचे काही खास क्षण शेअर केले आहेत. स्वाती घोडके या मेकअप आर्टिस्टच्या इन्स्टाग्राम अकाऊंटद्वारे एक खास व्हिडीओ शेअर करण्यात आला असून या व्हिडीओमध्ये प्रसाद-अमृताचा रोमॅंटिक अंदाज पाहायला मिळत आहे.
या व्हिडीओमध्ये अमृता तयार होत असताना प्रसाद तिची काळजी घेतानाचे पाहायला मिळत आहे. तिला छोट्या पंख्याने हवा देत आहे. त्याचबरोबर ती तयार होत असताना तिच्याकडे एकटक प्रेमाने बघत आहे आणि तिचे लाडही करत आहे. दरम्यान, या व्हिडीओमध्ये प्रसाद-अमृताची गुढीपाडवा स्पेशल फोटोशूटच्या आधीची तयारी करतानाचे व त्यानंतर ते गुढीपाडव्याच्या खास लुकमध्ये तयार झाल्याचे पाहायला मिळत आहे.
या व्हिडीओवर ‘प्रसाद-अमृता यांची पडद्यामागची धमाल मजामस्ती’ असं लिहिण्यात आले असून या व्हिडीओच्या कॅप्शनमध्ये “पडद्यावरील सुंदर जोडीचे पडद्यामागील काही खास क्षण” असं म्हटलं आहे. दरम्यान, प्रसाद-अमृताच्या या व्हिडीओला चाहत्यांनी लाईक्स व कमेंट्सद्वारे चांगलाच प्रतिसाद दिला आहे. अनेकांनी प्रसादच्या या प्रेमळ वागणुकीचे कौतुक केले आहे. त्याचबरोबर अनेकांनी प्रसाद-अमृताच्या या पारंपरिक लुकचेदेखील कौतुक केले आहे.