‘झी मराठी’ वाहिनीवरील ‘पारू’ या मालिकेवर प्रेक्षक भरभरुन प्रेम करताना दिसत आहेत. अल्पावधीतचं ही मालिका प्रेक्षकांच्या पसंती उतरली आहे. या मालिकेतील प्रत्येक पात्राने प्रेक्षकांच्या मनात स्वतःच असं विशेष स्थान निर्माण केले आहे. मालिकेतील पारूची भूमिका अभिनेत्री शरयू सोनावणे साकारत आहे. तर आदित्यच्या भूमिकेत अभिनेता प्रसाद जवादे पाहायला मिळत आहे. इतकंच नव्हेतर या मालिकेतील अहिल्यादेवी किर्लोस्कर या पात्रानेही प्रेक्षकांवर अक्षरशः जादू केली आहे. (Ahilyadevi Aka Mugdha Karnik)
मालिकेत अहिल्यादेवी हे पात्र जितकं कठोर आणि करारी वाटत आहे मात्र खऱ्या आयुष्यात या पात्राची एक वेगळीच बाजू आहे. अहिल्यादेवी किर्लोस्कर ही भूमिका मालिकेत अभिनेत्री मुग्धा कर्णिक साकारत आहे. करारी नजर, कठोर स्वभाव, एकचाली देहबोली ही अहिल्यादेवी यांच्या स्वभावाची वैशिष्ट्य आहेत, असं म्हणणं चुकीचं ठरणार नाही. मुग्धा कर्णिक हिने अहिल्यादेवी या पात्रातून प्रेक्षकांच्या मनात यशस्वी अशी छाप उमटवली आहे.
मालिकेत मुग्धा कठोर शिस्तबद्ध वाटत असली तरी प्रत्यक्ष जीवनात मात्र ती सगळ्यांशी मिळून मिसळून वागणारी आहे. तिच्या इंस्टाग्रामवर तिच्या स्वभावाची दखल घेणारे अनेक फोटो पाहायला मिळतील. पारू मालिकेत काम करण्याआधी मुग्धाने ‘झिम्मा’, ‘स्वाभिमान’, ‘होम स्वीट होम’ यांसारख्या मालिका, नाटक तसेच चित्रपटातून अभिनेत्री म्हणून महत्त्वपूर्ण कामगिरी बजावली. आता मुग्धा अहिल्यादेवीच्या भूमिकेतून मालिकाविश्वात आपली छाप पाडण्यास सज्ज झाली आहे.
याआधी मुग्धाने कधीही अहिल्यादेवी किर्लोस्करांसारखी कठोर अशी भूमिका साकारलेली नाही. मालिकेत अहिल्यादेवी किर्लोस्कर हे पात्र साकारताना मुग्धाचा पारंपरिक अंदाज प्रेक्षकांना अधिक भावतो. मात्र खऱ्या आयुष्यात मुग्धा खूपच ग्लॅमरस आहे. वेस्टर्न अंदाजातील मुग्धाचे अनेक फोटो सोशल मीडियावर आहेत ते फोटो पाहून ही खरंच अहिल्यादेवी आहे की काय?, हा प्रश्न पडतो. बरेचदा मुग्धा मराठी सिनेसृष्टीतील कलाकार मंडळींसह वेळ घालवतानाही दिसली आहे. मुग्धा व क्षिती जोगची बरीच घट्ट मैत्री असलेली पाहायला मिळते. सोशल मीडियावर एकमेकींबरोबरचे त्या अनेक फोटो शेअर करत असतात.
