‘झी मराठी’ वाहिनीवरील ‘तुला शिकवीन चांगलाच धडा’ या मालिकेला प्रेक्षक उत्तम प्रतिसाद देत आहेत. मालिकेच्या कथानकाने या मालिकेला एक वेगळं वळण आलेलं पाहायला मिळत आहे. मालिकेतील अक्षरा व अधिपतीच्या जोडीवर प्रेक्षक खूप प्रेम करतात. अशातच मालिकेत सध्या रंजक वळण आलेलं पाहायला मिळत आहे. भुवनेश्वरीचं मनं वळविण्यात अक्षरा यशस्वी झाली आहे. नुकत्याच समोर आलेल्या प्रोमोमध्ये याची एक झलक पाहायला मिळाली. (Tula Shikvin Changlach Dhada Promo)
आजवर मालिकेत भुवनेश्वरीने मालिकेच्या अगदी पहिल्या दिवसापासून अक्षराचा रागराग केला. अक्षराबद्दल मनात राग ठेवून ती नेहमीच मालिकेत वावरताना दिसली. त्यामुळे अक्षरा कशी वर जाणार नाही याकडे भुवनेश्वरीच बारीक लक्ष असतं. अक्षराचा शिक्षणाकडे असलेला कल पाहता ती आपल्यापेक्षा वरचढ ठरू शकते. या भीतीने भुवनेश्वरीने कायमच अक्षराला शिक्षणापासून दूर ठेवलं. मात्र अक्षराने ही लढाई स्वतः पार करत तिची शिकवण्याची आवड जोपासली.
अशातच एका स्पर्धेदरम्यान भुवनेश्वरीचा सत्कार होणार असतो. त्यावेळी काही महिला येऊन भुवनेश्वरी यांना चांगलंच सुनावतात. त्या महिलांपैकी एक बाई भुवनेश्वरी यांच्यावर चप्पल फेकून मारते. तितक्यात स्टेजवर उभी असलेली अक्षरा ती फेकलेली चप्पल पकडते. हे पाहून भुवनेश्वरीला खूप मोठा धक्का बसतो. अशातच आता मालिकेच्या नव्या प्रोमोने साऱ्यांचं लक्ष वेधलं आहे. त्या महिलांच्या कृतीवर अक्षरा भडकलेली दिसत आहे. अक्षरा त्या महिलांची चांगलीच कानउघडणी करताना दिसत आहे.
प्रोमोमध्ये अक्षरा असं बोलताना दिसत आहे की, “एखाद्या व्यक्तीवर जीवापाड प्रेम करणं, तिच्यासाठी संपूर्ण आयुष्य समर्पित करणं हा तुम्हाला गुन्हा वाटतो का?, चारूहांस सूर्यवंशी म्हणजे माझे सासरे यांच्या बायकोच्या अधिकाराने नाही तर माझे पती अधिपती यांच्या आईच्या अधिकाराने ते या घरात राहतात. माझे सासरे जरी त्यांना बायको मानत नसले तरी अधिपतींनी त्यांना आई मानलं आहे”. हे पाहून भुवनेश्वरीच्या डोळ्यातही पाणी आलं आहे. सूनेने सासूची ठामपणे घेतलेली बाजू सर्वांनाच चकित करुन सोडते.
