सध्या मराठी प्रेक्षकवर्ग हा रंगमंचाकडे वळलेला पाहायला मिळत आहे. मराठी नाटकांना प्रेक्षकांचा उत्स्फूर्त प्रतिसाद मिळताना पाहायला मिळत आहे. अशातच एका मोठ्या नाटकाबाबत आश्चर्याचा धक्का देणारी बाब समोर आली आहे. महाराष्ट्राची हास्यजत्रा या कार्यक्रमातून अभिनेत्री विशाखा सुभेदार यांनी प्रेक्षकांच्या मनात घर केलं. मात्र त्यानंतर त्यांनी या कार्यक्रमातून काढता पाय घेत रंगभूमीकडे पावलं टाकली. विशाखा ही एक उत्तम अभिनेत्री असण्याबरोबरच एक निर्मातीदेखील आहे. (Vishakha Subhedar On Namrata Sambhrao And Prasad Khandekar)
सध्या रंगभूमीवर गाजत असलेले ‘कुर्रर्रर्रर्र’ या नाटकाची निर्मिती तिनेच केली आहे. या नाटकात प्रसाद खांडेकर, नम्रता संभेराव, पंढरीनाथ कांबळेसह विशाखाने अभिनय केला आहे. त्याचबरोबर तिने या नाटकाची निर्मितीदेखील केली आहे. या नाटकांत काही बदल करणार असल्याची एक पोस्ट काल विशाखा हिने तिच्या इंस्टाग्राम अकाऊंटवरून शेअर केली होती. त्यामुळे या नाटकादरम्यान नेमका कोणता बदल होणार याकडे साऱ्यांचा नजरा लागून राहिल्या होत्या. अशातच पुन्हा एकदा एक पोस्ट शेअर करत विशाखाने झालेल्या बदलाबाबत स्पष्टीकरण दिलं आहे.
इंस्टाग्राम अकाऊंटवरून स्टोरी पोस्ट करत विशाखाने “कुर्रर्रर्रर्र’ नाटकातून प्रसाद खांडेकर आणि नम्रता आवटे संभेराव यांची एक्झिट. पहा कोणते दोन कलाकार प्रेक्षकांच्या कानात कुर्रर्रर्रर्र करण्यासाठी सज्ज आहेत? असं म्हणत पोस्ट शेअर करत दोन नवे चेहरेही दाखवले आहेत. कुर्रर्रर्रर्र या नाटकातून नम्रता संभेराव व प्रसाद खांडेकर यांची एक्झिट झाली असून याजागी अभिनेत्री मयुरा रानडे व अभिनेता प्रियदर्शन जाधव हे कलाकार दिसणार आहेत. विशाखाने हा आश्चर्याचा धक्का तिच्या अधिकृत इंस्टाग्राम अकाऊंटवरून दिला आहे.
विशाखाने इन्स्टाग्राम अकाऊंटद्वारे याआधी ही एक पोस्ट शेअर केली होती. नाटकाबद्दलची एक पोस्ट शेअर करत तिने आगामी काळात नाटकात होणाऱ्या बदलाविषयी संगितले आहे. या पोस्टमध्ये तिने असं म्हटलं आहे की, “कुर्रर्रर्रर्र हे माझं, प्रग्यास (निर्मिती संस्था)चं पहिलं नाटक आहे. ४ डिसेंबरला या नाटकाचा शुभारंभ होऊन आता दोन वर्ष पूर्ण होतील! कोव्हिडसारख्या काळात धडपड करुन हे नाटक उभं केलं. या नाटकात प्रसाद खांडेकर, नम्रता संभेराव, पंढरीनाथ कांबळे यांचीही साथ होतीच. पण आता त्यात काही बदल घडत आहेत. काहीही झालं तरी जोवर नाटक जगत आहे, तोवर जगवायचं हे निर्मिती संस्थेचं काम आहे आणि ते काम मी इमाने इतबारे करत राहणार. पुन्हा एकदा नवीन मोट बांधत आहे. नाटकात काही बदल होणार आहेत आणि हे बदल काय हे तुम्हाला लवकरच सांगेन. तोपर्यंत तुमचे आशीर्वाद आणि प्रेम असंच राहू द्या.”
