निर्मितीनंतर पहिल्याच प्रयोगासाठी मिळालेला नकार, त्यानंतर काही वर्षाच्या प्रतिक्षेनंतर रंगभूमीवर निवडक प्रयोगाची संधी आणि पुन्हा वादविवादात अडकल्यानंतर थांबवलेलं नाटक म्हणजे विनय आपटे दिग्दर्शित ‘मी नथुराम गोडसे बोलतोय’. काही वर्षांपूर्वी प्रचंड वादग्रस्त ठरलेलं हे नाटक २०१७साली थांबवण्यात आलं. आता सहा वर्षांनंतर हे नाटक पुन्हा रंगभूमीवर येत आहे. एकाच वेळी दोन नाटकं येऊ घातल्यामुळे ‘नथुराम विरुद्ध नथुराम’ असा प्रयोग रंगण्याची चिन्ह दिसत आहेत. (Me nathuram godse boltoy Marathi play on stage again)
यापूर्वी रंगभूमीवर गाजलेलं माऊली प्रॉडक्शन अंतर्गत ‘मी नथुराम गोडसे बोलतोय’ हे नाटक लवकरच पुन्हा रंगभूमीवर पदार्पण करत आहे. ‘नथुराम’च्या भूमिकेत दिसलेले अभिनेते शरद पोंक्षे यांनी ‘नथुराम गोडसे बोलतोय’ हे नाटक घेऊन येत असल्याचं जाहीर केलं आहे. नाटकाचं शार्षक जवळपास सारखंच असल्यामुळे न्यायालयीन वाद होण्याची शक्यता दिसत आहे.
ज्येष्ठ नाटककार प्रदीप दळवी यांनी लिहिलेलं ‘मी नथुराम गोडसे बोलतोय’ हे नाटक निर्माते उदय धुरत यांनी १९९८ साठी माऊली प्रॉडक्शनतर्फे रंगभूमीवर आणलं होतं. या नाटकाचे दिग्दर्शन विनय आपटे यांनी केलं. शरद पोंक्षे यांनी या नाटकात साकारलेलं ‘नथुराम’ हे पात्र बरंच लोकप्रिय झालं होतं. वादग्रस्त विषयामुळे हे नाटक बरंच चर्चेतही राहिलं. या नाटकाचे ८१६ प्रयोग झाल्यानंतर हे नाटक थांबविण्याचा आले. यानंतर शरद पोंक्षे यांनी ‘हे राम नथुराम’ या नवीन नाटकातून रंगभूमीवर पदार्पण केलं.
आता नाट्यनिर्माते उदय धुरत हे नाटक पुन्हा घेऊन येत आहे. या नाटकाचे विवेक आपटे दिग्दर्शन करत असून या नाटकाची तालीम ३ ऑक्टोबरपासून सुरु होत आहे. मात्र या नाटकात ‘नथुराम’च्या भूमिकेत अभिनेता सौरभ गोखले दिसणार आहे. हे नाटक ऑक्टोबरमध्ये येणार असल्याची जाहिरात प्रसिद्ध झाली होती.तर आता दुसरीकडे शरद पोंक्षे यांच्या ‘नथुराम गोडसे बोलतोय’ या नाटकाची जाहिरात १५ ऑगस्टला प्रसिद्ध झाली. शरद पोंक्षे या नाटकात मुख्य भूमिकेत दिसणार असून नाटकाचे ५० प्रयोग होणार असल्याचे जाहीर करण्यात आलं आहे.
‘मी नथुराम गोडसे बोलतोय’ हे नाटक आता नव्याने रंगभूमीवर येत असताना ‘नथुराम’ या भूमिकेचं आव्हान कोण पेलणार हे पाहणं रंजक ठरणार आहे. नथुरामच्या भूमिकेसाठी सुमारे २५-३० कलाकारांच्या ऑडिशन्स घेण्यात आल्या होत्या. त्यानंतर सौरभ गोखलेची निवड करण्यात आली आहे.