मराठीसह हिंदी चित्रपटसृष्टीमधील सोज्वळ व्यक्तीमत्त्व म्हणून ओळख असणाऱ्या ज्येष्ठ अभिनेत्री सीमा देव यांचं आज सकाळी निधन झालं. त्या ८१ वर्षांच्या होत्या. वांद्रे येथील राहत्या घरी सीमा देव यांच्या अखेरचा श्वास घेतला. त्यांच्या देव कुटुंबियांवर दुःखाचा डोंगर कोसळला आहे. गेल्यावर्षी सीमा देव यांचे पती व ज्येष्ठ अभिनेते रमेश देव यांचं निधन झालं. सीमा यांना गंभीर आजाराने घेरलं. या आजारादरम्यानच त्या पूर्ण थकल्या होत्या. आता सीमा यांची मुलं अजिंक्य देव व अभिनय देव यांनी दुःख व्यक्त केलं आहे.
कुटुंबात निर्माण झालेली पोकळी आता भरुन निघणार नसल्याची खंत अजिंक्य देवने बोलून दाखवली, अजिंक्य म्हणाला, “आज माझी आई सीमा देव यांचं निधन झालं. सकाळी सात वाजता ती गेली. गेली तीन ते चार वर्ष ती अल्झायमर या आजाराचा सामना करत होती. पूर्ण विस्मृती तिला झाली होती. बाबांना जाऊन आता कुठे दिड वर्ष झालं होतं”.
“आईला काही आठवत नव्हतं, कळत नव्हतं पण ती होती. पण आज दोघंही नाहीत. खूप मोठी पोकळी कुटुंबामध्ये निर्माण झाली आहे. निर्माण झालेली पोकळी मी बोलू किंवा सांगू शकत नाही”. अजिंक्य देवने आपल्या भावनांना वाट मोकळी करुन दिली.
सीमा यांचा दुसरा मुलगा अभिनय देव म्हणाला, “मी फक्त एवढंच सांगेन की, गेल्या तीन ते चार वर्षांपासून ती अल्झायमर या विचित्र आजारामुळे त्रस्त होती. पण खरं सांगायचं झालं तर वयाच्या तेराव्या वर्षापासून माझी आई वेगवेगळ्या रितीने झगडत आलेली आहे. तरीही या सगळ्यामध्ये ती खूप खूश होती. मला माहित असलेली जगातील सर्वात सुंदर महिला कोण तर ती माझी आई होती. एका अर्थाने तिचा त्रास आता कमी झाला आहे. ती आता एका चांगल्या जागी आहे हे मला माहीत आहे”. सीमा देव यांच्या निधनानंतर संपूर्ण कुटुंबियांवर दुःखाचा डोंगर कोसळला आहे.