Priyadarshan Jadhav on limelight : कलाकार मंडळी म्हटलं की त्यांचा लाइमलाईटचा प्रवास आपसूकच डोळ्यासमोर येतो. अशी बरीच कलाकार मंडळी आहेत जी प्रसिद्धीझोतात येण्यासाठी नेहमीच काही ना काही प्रयत्न करतात. अर्थात कलाकार मंडळी म्हटलं की, त्यांचा अथक प्रवास, मेहनत ही आलीच. प्रचंड मेहनतीनंतर ही कलाकार मंडळी त्यांच्या यशाच्या शिखरावर पोहोचतात. हो. पण त्यांचा हा प्रवास काही सोपा नाही. या कलाकारांच्या प्रसिध्दीझोताबाबत नुकत्याच एका मराठमोळ्या अभिनेत्याने भाष्य केलं आहे. हा अभिनेता म्हणजे प्रियदर्शन जाधव. प्रियदर्शनने प्रसिद्धीझोतात येण्याचं स्वप्न बाळगणं हे चुकीचं नसल्याचं म्हणत यावर भाष्य केलं आहे.
नुकतीच प्रियदर्शनने आरपार या युट्युब चॅनेलला मुलखात दिली. यावेळी बोलताना त्याला, “जेव्हा सतत तुम्ही लाइमलाइटमध्ये असता, तेव्हा त्याची तुम्हाला भीती वाटायला लागते का?”, असा प्रश्न मुलाखतीदरम्यान विचारण्यात आला. त्यावर प्रियदर्शन म्हणाला, “तुम्ही काही चुकीचं केलं नाही, तर भीती वाटण्याचं काही कारण नाही. लाइमलाइट उत्तम पद्धतीने स्वीकारता आलं पाहिजे. ते नीट टिकवता आलं पाहिजे. अर्थाचा अनर्थ होईल की काय, ट्रोल होऊ की काय ही भीती लाइमलाइटमध्ये आल्यानंतर असते. त्याबरोबरच सध्या आपल्याकडे ही प्रसिद्धी आहे, पण, ती पुढे कायम राहील याची शाश्वती नाही. त्यामुळे हे आपल्या हातातून निघून जाईल की काय, अशी एक भीती असते; पण ट्रॅपमध्ये अडकू नये, या मताचा मी आहे.
“आता जर लाइमलाइटमध्ये आहात, तर त्याचा आनंद घ्या आणि उद्या जर तुम्ही लाइमलाइटमध्ये नसाल. दुसरं कोणीतरी असेल, तर ते तुम्हाला छान पद्धतीनं स्वीकारता आलं पाहिजे. कोणाला तरी लाइमलाइटकडे पळायचं असतं आणि कोणाला तरी कलेत प्राविण्य मिळवायचं असतं. त्यामध्ये उत्तम काम करायचं असतं. तर कोणाला कुठे जायचं आहे, हा ज्याचा-त्याचा प्रश्न आहे. पण, लाइमलाइट ही खूप मस्त गोष्ट आहे आणि मी तिचा खूप आनंद घेतो. सगळ्यांना लाइमलाइटमध्ये राहायला आवडतं आणि फार कमी लोकांना ते मिळतं. तुम्ही जर स्मार्ट असाल, तर लाइमलाइट टिकवता येईल. या क्षेत्रात राहण्यासाठी ते थोडंफार करावं लागतं”.
आणखी वाचा – …म्हणूनच शेफाली जरीवालाच्या निधनादिवशी कुत्र्याला घेऊन फिरत होता पराग त्यागी, त्याला मोठा धक्का बसला अन्…
“माझा एक मित्र आहे. मी त्याचं नाव घेणार नाही. तो लाइमलाइटमध्ये राहण्यासाठी वाटेल ते करतो. वाटेल ते म्हणजे ऊठसूट काहीतरी घाणेरडं करतो, असं नाही. लाइमलाइटमध्ये टिकून राहण्यासाठी विविध दृष्टिकोनातून स्वतःच्या करिअरकडे बघतो. तो त्याचा पुरेपूर वापर करुन घेतो. मला त्यात काही चुकीचं वाटत नाही. भासवलं असं जातं की, हा किती स्वतःचा मोठेपणा सांगतोय. स्वतःचं किती कौतुक सांगत आहे, असं त्याच्याकडे पाहिलं जातं. त्यावर लोक बोलतात. पण मला वाटतं की, तो प्रोफेशनचा भाग आहे. प्रियदर्शन पुढे असेही म्हणाला की, यशाबरोबर अनेक गोष्टी येतात. आव्हानं, अडचणी, जबाबदारी यांसह काही नकारात्मक गोष्टीही यशाबरोबर येतात. तर ती बॅग घेऊन तुम्हाला चालावं लागतं. ती बॅग सुटली की, यश सुटतं. तुम्हाला तुमच्या खांद्यावर ते घ्यावंचं लागणार, त्याला पर्याय नाही”.
