Bhushan Patil On Sachin Pilgaonkar : सध्या सोशल मीडियावर ट्रोलिंगचा मुद्दा मोठ्या प्रमाणावर वाढला आहे. चांगलं-वाईट काहीही असलं तरी नेटकरी ट्रोलिंग करणं काही थांबवत नाहीत. दरम्यान, हे प्रमाण आता प्रचंड वाढलं आहे. विशेषतः कलाकार, नेतेमंडळी यांच्या वाटेला हा ट्रोलिंगचा मुद्दा अधिक येतो. बहुतेक अशी कलाकार मंडळी आहेत जी नेहमीच ट्रोलिंगची शिकार होतात. बरेचदा या ट्रोलिंगकडे ही कलाकार मंडळी दुर्लक्ष करतात तर काहीवेळा सडेतोडपणे ही कलाकार मंडळी केलेल्या ट्रोलिंगला उत्तर देतात. दरम्यान, मनोरंजन विश्वात बरेच दिवसांपासून अभिनेते सचिन पिळगांवकर ट्रोल होताना दिसले आहेत.
बऱ्याच दिवसांपासून सचिन पिळगांवकर यांच्या जुन्या मुलाखती व्हायरल होत आहेत. त्यांना त्यावरुन ट्रोल केलं जातं आहे. शिवाय सचिन यांचे मिम्सही व्हायरल होत आहेत. अशातच आता कलाकारांना ट्रोल करणाऱ्या ट्रोलर्सना मराठी अभिनेत्यानं चपराक दिली आहे. मराठी अभिनेता भूषण पाटीलने सोशल मीडियावर व्हिडीओ शेअर करत ट्रोलर्सना चांगलंच सुनावलं आहे. अभिनेत्याची ही पोस्ट सध्या सोशल मीडियावर तुफान व्हायरल होत आहे.
आणखी वाचा – “जे बाळासाहेबांना जमलं नाही ते फडणवीसांना जमलं”, राज ठाकरेंच्या वक्तव्याची चर्चा, थेट सरकारला सवाल, म्हणाले…
भूषण पाटीलने पोस्ट शेअर व्हिडीओ शेअर केला. या व्हिडीओमध्ये त्याने म्हटलं की, “आजकाल एक नवीन ट्रेंड चालला आहे. मराठी कलाकारांना ट्रोल करण्याचा. हल्लीच सचिन पिळगांवकर सरांच्या मुलाखतींचे काही कमेंट्स किंवा त्याच्या आधी संतोष जुवेकरवर खूप ट्रोलिंग केलं गेलं. आणि आणखीन इतर कलाकार. मला माहित नाहीये, हे कोण करतंय, हे जाणून बुजून केलं जातंय, पण मला ह्या ट्रोलर्सना त्यांच्याच भाषेत सांगायचंय. तुमचे बाप ज्यावेळी डायपरमध्ये होते ना, तेव्हापासून हा माणूस अभिनय करतोय. त्यामुळे इतर कलाकारांना ट्रोल करण्यापेक्षा स्वतःच्या आयुष्यावर लक्ष द्या. तुमच्या भल्याचं सांगतोय”.
या व्हिडीओची पोस्ट शेअर करत त्याने कॅप्शन देत असं म्हटलं की, “स्वतःच्या भाषेचा आणि कलाकारांचा आदर करायला शिका”. अभिनेत्याने ही पोस्ट सचिन पिळगांवकर यांना टॅगदेखील केलेली पाहायला मिळत आहे.
