अभिनेत्री विशाखा सुभेदार यांनी आजवर विविध पात्र साकारत प्रेक्षकांचं मनोरंजन केलं आहे. ‘महाराष्ट्राची हास्यजत्रा’ या विनोदी कार्यक्रमातून तर त्यांनी प्रेक्षकांच्या मनात आपली वेगळी जागा निर्माण केली आहे. सध्या त्या ‘शुभविवाह’ मालिकेत नकारात्मक भूमिका साकारताना दिसत आहेत. अशातच आता विशाखा यांचा एक वेगळाच अंदाज पाहायला मिळत आहे. लवकरच त्यांचा ‘एकदा येऊन तर बघा’ हा चित्रपट प्रेक्षकांच्या भेटीला येणार आहे. त्यात त्यांचा वेगळाच अंदाज पाहायला मिळणार आहे. (vishakha subhedar new dashing look)
सध्या विशाखा यांच्या या चित्रपटातील बेधडक आणि डॅशिंग लूक समोर आला आहे. त्यांनी इन्साग्रामवर या लूकचा फोटो शेअर केला. त्यांच्या या लूकची चांगलीच चर्चा रंगताना पाहायला मिळत आहेत. या फोटोंमध्ये त्या हातात गन घेतलेल्या आणि विशिष्ट वेशभूषा दिसत आहेत. हे पाहता विशाखा एखाद्या खलनायकाच्या भूमिकेत दिसणार असल्याचा म्हटलं जात आहे. त्यांचा हा ‘शूटर’ अंदाज आगामी चित्रपटासाठी असून यात त्यांनी ‘मगरु’ या ‘शार्प शूटर’ ची भूमिका साकारली आहे. त्यांचा हा ‘डॅशिंग रावडी लूक’ नेटकऱ्यांनाच्याही बराच पसंतीस पडताना दिसत आहे. एका नेटकऱ्याने तर, ‘डॉन वाटते आहेस ताई’ असं म्हणत कमेंट केली आहे. तर बरेच नेटकरी खतरनाक अंदाज म्हणत कमेंट करत विशाखा यांचं कौतुक करत आहेत.
या भूमिकेबद्दल बोलताना विशाखा म्हणाल्या, “ही अतिशय भन्नाट व्यक्तिरेखा आहे. ‘ग्रे शेड’ भूमिका साकारताना मला मेकअप, बॉडी लँग्वेज, एक्स्प्रेशन्स या सगळ्यांकडे खास लक्ष द्यावं लागलं. भूमिका कोणत्याही प्रकारची असली, तरी ती चांगली व्हावी यासाठी कलाकारांना कष्ट घ्यावे लागतात. एकाच इमेजमध्ये मला अडकून पडायचं नव्हतं. त्यामुळे मी ही वेगळी भूमिका स्वीकारली आहे”. येत्या २४ नोव्हेंबरला हा चित्रपट प्रेक्षकांच्या भेटीला येणार आहे. या चित्रपटाची निर्मिती परितोष पेंटर, राजेशकुमार मोहंती, दिपक क्रिशन चौधरी, सेजल दिपक पेंटर यांनी केली आहे. तर सहनिर्मिता अश्विन पद्मनाभन, सत्यनारायण मूरथी, डॉ.झारा खादर यांची आहे.
आणखी वाचा – “निदान आज तरी…”, शशांक केतकरची रस्त्यावरील सिग्नलबाबत पोस्ट, म्हणाला…
या चित्रपटात विशाखा सुभेदार यांच्याबरोबर गिरीश कुलकर्णी, सयाजी शिंदे, भाऊ कदम, तेजस्विनी पंडित, पॅडी कांबळे, ओंकार भोजने, प्रसाद खांडेकर, राजेंद्र शिसातकर, नम्रता संभेराव, वनिता खरात, शशिकांत केरकर, रोहित माने, सुशील इनामदार यांच्यासही इतरही कलाकारांची भली मोठी फौज या चित्रपटात आहे. विनोदी अभिनेता प्रसाद खांडेकर या चित्रपटाच्या निमित्ताने दिग्दर्शकीय भूमिकेत पदार्पण करणार आहेत.