फेब्रुवारी महिना म्हणजे प्रेमाचा महिना. कारण या महिन्यात येतो तो ‘व्हॅलेंटाईन डे’. १४ फेब्रुवारीला जगभरात व्हॅलेंटाईन डे साजरा केला जातो आणि याआधी ७ दिवसांपासून चॉकलेट डे, प्रॉमिस डे, प्रपोज डे सारखे काही खास दिवसही साजरे केले जातात. अशातच नुकताच काल (९ फेब्रुवारी) रोजी प्रपोज डे पार पडला आणि याच खास दिवसाचे औचित्य साधत एका मराठमोळ्या जोडीने त्यांच्या प्रेमाची जाहीर कबुली दिली. ही लोकप्रिय जोडी म्हणजे अभिनेत्री तितीक्षा तावडे व अभिनेता सिद्धार्थ बोडके.
खरंतर, गेल्या अनेक दिवसांपासून हे दोघे एकमेकांना डेट करत असल्याच्या अनेक चर्चा सोशल मीडियावर रंगत होत्या. त्यांचे एकत्र फोटो व व्हिडीओ पाहून चाहत्यांमध्ये हे दोघे रिलेशनमध्ये असल्याचा अंदाज वर्तवला होता. मात्र दोघांनी आजवर कधीही त्यांच्या नात्याबद्दल भाष्य केले नव्हते. अशातच काल तितीक्षा-सिद्धार्थने इन्स्टाग्रामवर त्यांचा एक खास फोटो शेअर करत आपल्या प्रेमाची जाहीर कबुली दिली आहे. तितीक्षाने सिद्धार्थ बरोबरचा केळवणाचा फोटो शेअर करत चाहत्यांना सुखद धक्का दिला.
तितीक्षाने शेअर केलेल्या या फोटोमध्ये दोघेही प्रेमात आकंठ बुडालेल्या एका प्रेमीयुगुलाप्रमाणे एकमेकांच्या डोळ्यात पाहत आहेत. हा क्युट फोटो शेअर करत तितीक्षाने “त्याने मला डेटसाठी विचारलं आणि आमच्या या सुंदर डेटचं केळवणात रुपांतर झालं” असं गोड कॅप्शनही दिलं आहे. या फोटोमध्ये तितीक्षाने ऑफ व्हाइट रंगाची साडी परिधान केली आहे, तर सिद्धार्थनेही तिच्या साडीला साजेसा असा शर्ट परिधान केला असल्याचे पाहायला मिळत आहे.
दरम्यान, दोघांनी त्यांचा हा फोटो शेअर करताच चाहत्यांनी या फोटोवर लाईक्स व कमेंट्सद्वारे वर्षाव केला आहे. मराठी मनोरंजन विश्वातूनही त्यांच्यावर शुभेच्छांचा वर्षाव होत आहे. हृता दुर्गुळे, सुयश टिळक, रसिका सुनील, पल्लवी पाटील, सानिया चौधरी, स्पृहा जोशी, ऋतुजा बागवे, गौतमी देशपांडे, गौरी नलावडे, दीपा चौधरी, ऐश्वर्या नारकर यांसह अनेक कलाकारांनी त्यांना शुभेच्छा दिल्या आहेत.
दरम्यान, दोघांच्या कामाबद्दल बोलायचे झाले तर तितीक्षा सध्या झी मराठीवरील ‘सातव्या मुलीची सातवी मुलगी’ मालिकेद्वारे प्रेक्षकांचं मनोरंजन करत आहे. तर सिद्धार्थ ‘दृश्यम २’ या बॉलिवूड चित्रपटात व नुकत्याच प्रदर्शित झालेल्या ‘श्रीदेवी प्रसन्न’मध्ये झळकला आहे.