मराठमोळ्या अभिनेत्रींच्या यादीत एका अभिनेत्रीच नाव आवर्जून घेतलं जात ते म्हणजे अभिनेत्री शिवानी सुर्वे. शिवानीने आजवर तिच्या अभिनयशैलीने प्रेक्षकांच्या मनावर राज्य केलं. काही दिवसांपासून शिवानी तिच्या लग्नामुळे चर्चेत आहे. अभिनेत्रीने अभिनेता अजिंक्य ननावरेसह लग्नगाठ बांधली. लग्नानंतर ही जोडी वेळात वेळ काढत फिरतानाही दिसली. ‘देवयानी’ मालिकेमुळे महाराष्ट्राच्या घराघरात पोहोचलेली प्रेक्षकांची लाडकी अभिनेत्री शिवानी सुर्वे नव्या रुपात प्रेक्षकांच्या भेटीला येणार आहे. ‘स्टार प्रवाह’ची नवी मालिका ‘थोडं तुझं आणि थोडं माझं’ मधून शिवानी तब्बल ९ वर्षांनंतर ‘स्टार प्रवाह’च्या मालिकेत दिसणार आहे. (Shivani Surve New Serial)
‘थोडं तुझं आणि थोडं माझं’ मालिकेत ती मानसी सणस ही व्यक्तिरेखा साकारणार आहे. अतिशय हुशार, स्वाभिमानी, प्रामाणिक असलेली मानसी आपल्या वडिलांच्या शब्दाबाहेर नाही. वडिलांनी खूप कष्ट करून त्यांचं साम्राज्य उभं केलं. आपल्या मुलीनेही खूप शिकून नाव कमवावं असं त्यांना वाटतं. वडिलांचं स्वप्न मानसीला पूर्ण करायचं आहे. आपल्या कॉलेजची टॉपर गायत्री मॅडमच्या हुशारीवर मानसी खूप प्रभावित आहे. पण आपल्या समोर कुणालाही जिंकू न देणाऱ्या गायत्रीच्या स्वार्थी स्वभावाची तिला कल्पना नाही.
खरी ठिणगी तेव्हा पडते जेव्हा मानसी पदवी परिक्षेत टॉप करत गायत्रीचा रेकॉर्ड मोडते. मानसीला नाती जोडून ठेवायला आवडतात. कुठलंही नातं टिकवायचं असेल तर फक्त आपल्याच बाजूने विचार करुन चालत नाही. नातं परिपूर्ण होण्यासाठी थोडं तुझं आणि थोडं माझं असावं असं तिला वाटतं. अशी ही मानसी मालिकेत धुमाकूळ घालणार आहे. तब्बल ९ वर्षांनंतर पुन्हा एकदा मालिकेत काम करण्यासाठी अभिनेत्री शिवानी सुर्वे फारच उत्सुक आहे.
मालिकेबाबत मत व्यक्त करताना शिवानी म्हणाली, “‘स्टार प्रवाह’ कुटुंबाबरोबर पुन्हा एकदा जोडली जात आहे याचा आनंद आहे. स्टार प्रवाहच्या मालिकांचे विषय, त्याची मांडणी मला खूपच भावते. त्यामुळेच ‘थोडं तुझं आणि थोडं माझं’ मालिकेसाठी मी लगेच होकार दिला. मानसी हे पात्र मला अतिशय आवडलं. ‘देवयानी’ मालिकेला प्रेक्षकांचं भरभरुन प्रेम मिळालं. हेच प्रेम आणि यश माझ्या नव्या मालिकेलाही मिळेल याची खात्री आहे”.
