मराठी सिनेसृष्टीत सध्या लगीनघाई सुरु असलेली पाहायला मिळत असतानाच प्रेक्षकांचा लाडका दगडू म्हणजेच अभिनेता प्रथमेश परब विवाहबंधनात अडकला. प्रथमेशने त्याची गर्लफ्रेंड क्षितिजा घोसाळकरसह लग्नगाठ बांधत त्यांच्या आयुष्यातील एका नव्या वेगळ्या वळणावर पाऊल टाकलं आहे. प्रथमेश व क्षितिजा यांच्या लग्नसोहळ्यातील धमाल, मस्तीचे व्हिडीओ, फोटो सोशल मीडियावर तुफान वायरल झाले. अत्यंत साधेपणानं व पारंपरिक अंदाजात प्रथमेश व क्षितिजा यांचा लग्नसोहळा संपन्न झाला. दोघांनी त्यांच्या लग्नसोहळ्यातील खास लूकचे फोटो त्यांच्या सोशल मीडिया अकाउंटवरुन शेअर केले आहेत. (Prathamesh Parab Kshitija Ghosalkar Wedding )
प्रथमेश व क्षितिजा यांच्या साखरपुड्याचे, हळदी व मेहंदीचे फोटोही सोशल मीडियावर तुफान व्हायरल झाले. लग्नानंतर ही जोडी छोटासा ब्रेक घेत पुण्यातील लोणावळा येथे फिरायला देखील गेलेली पाहायला मिळाली. लोणावळा येथे एन्जॉय करतानाचे खास फोटोही त्यांनी इंस्टाग्राम अकाउंटवरुन शेअर केले होते. सोशल मीडियावरुन शेअर केलेल्या त्यांच्या एका पोस्टाने साऱ्यांचेच लक्ष वेधून घेतले आहे. प्रथमेश व क्षितिजा यांनी त्यांच्या सत्यनारायणाच्या पूजेचा खास फोटो शेअर केला आहे.
सासरी गेल्यानंतर क्षितिजा परबांच्या घरी रमलेली पाहायला मिळाली. तुळशी वृंदावनाचं डेकोरेशन करत त्यांनी सत्यनारायणाची पूजा त्यात मांडली होती. दोघांनी हात जोडून नमस्कार करतानाचे काही खास फोटो शेअर केले आहेत. यावेळी क्षितिजा व प्रथमेश यांचा पारंपरिक अंदाज प्रेक्षकांना पाहायला मिळाला. क्षितिजाने यावेळी हिरव्या रंगाची काठापदराची सुंदर अशी साडी नेसली होती तर प्रथमेश हिरव्या रंगाच्या कुर्ता पायजमामध्ये दिसला. शिवाय त्यांनी त्यांच्या सत्यनारायणाच्या पूजेवेळी परब व घोसाळकर कुटुंबीयांचा एकत्र फॅमिली फोटोदेखील शेअर केला. यावेळी प्रथमेशच्या घराची छोटीशी झलकही पाहायला मिळाली.
समोर आलेल्या फोटोंमध्ये प्रथमेशचं घर खूपच सुंदर दिसत होतं. दरम्यान प्रथमेशच्या घरातील देवघराची छोटीशी झलक पाहायला मिळाली तसेच प्रथमेशने लग्नानंतरच्या काही विधींचा एक व्हिडीओ शेअर केला आहे. या व्हिडीओमध्ये प्रथमेशने त्याच्या घराच्या एका कोपऱ्यात त्याला मिळालेल्या पुरस्कारांचा संच केलेला पाहायला मिळाला. प्रथमेशने त्याच्या अभिनयाने प्रेक्षकांची कायमच मन जिंकली आहेत.