छोट्या पडद्यावरील लोकप्रिय ‘बिग बॉस मराठी’ या कार्यक्रमामुळे अभिनेता माधव देवचके प्रसिद्धीस आला. माधवने आजवर अनेक मराठी मालिकांमध्ये महत्त्वपूर्ण भूमिका साकारत प्रेक्षकांची मनं जिंकली आहेत. याशिवाय माधवने चित्रपटातूनही प्रेक्षकांच्या मनावर राज्य केलं आहे. मात्र ‘बिग बॉस’ मराठीमुळे माधव खऱ्या अर्थाने घराघरांत पोहोचला. मात्र ‘बिग बॉस’नंतर माधव तितकासा सिनेसृष्टीत दिसला नाही. अशातच आता माधवने छोट्या पडद्यावर पुन्हा एकदा दमदार कमबॅक केलं असल्याचं समोर आलं आहे. (Madhav Deochake Comeback)
स्टार प्रवाह वाहिनीच्या अबोली या मालिकेतून माधवने मालिकाविश्वात कमबॅक केलं आहे. अबोली मालिकेचं कथानक अतिशय उत्कंठावर्धक वळणावर येऊन पोहोचलं आहे. अन्यायाविरोधात आवाज उठवत न्याय मिळवून देण्याचा अबोलीने घेतलेला वसा अनेकांसाठी आशेचा किरण ठरत आहे. नवनव्या केसचा छडा लावत असतानाच आता अबोलीच्या वैयक्तिक व व्यावसायिक आयुष्यात नव्या पात्राची एण्ट्री होणार आहे. या नव्या पात्राचं नाव आहे श्रेयस सुमन मराठे असे आहे.
सुप्रसिद्ध अभिनेता माधव देवचके श्रेयस सुमन मराठे हे पात्र साकारणार आहे. अबोलीच्या विरोधात श्रेयस केस लढणार आहे. या नव्या आव्हानाचा अबोली व अंकुश कसा सामना करणार हे पाहणं रंजक ठरणार आहे. याआधी देवयानी व गोठ या मालिकेत माधवने लक्षवेधी भूमिका साकारली होती. श्रेयस सुमन मराठे ही व्यक्तिरेखा देखील हटके असणार असल्याचं पाहायला मिळत आहे. श्रेयसचं आपल्या आईवर प्रचंड प्रेम होतं. त्यामुळे नावाबरोबरच तो आईचही नाव लावतो.
अतिशय हुशार, यशस्वी व हवी असणारी गोष्ट मिळवण्यासाठी वाट्टेल ते करणारा श्रेयस अबोली-अंकुशच्या आयुष्यात नेमकी कोणती उलथापालथ घडवणार हे पाहणं मालिकेत रंजक ठरेल.
